中共總書記習近平喺星期一（17日）同阿里巴巴創辦人馬雲，以及多名民營企業負責人舉行座談會，會議強調要促進民營經濟健康發展，並釋出「國家保護民營企業家、鼓勵支持民營經濟」嘅訊號。雖然內地官媒積極解讀會議內容，形容呢次座談會有助提振中國經濟增長預期，但A股市場並無受「激勵」，滬深創三大指數星期二（18日）低收，跌幅接近1%至2%。

《新華社》報道指，呢次座談會釋放出「促進民營經濟健康發展、高質量發展」嘅重要訊號，而《新京報》就形容會議「進一步提振2025年中國經濟增長預期」。微信公眾號「正和島」亦發文指出，馬雲自從數年前淡出商界後，如今重返商業一線，並且參與最高層座談會，顯示官方對民營企業嘅支持更趨明確。

不過，A股市場未有即時受惠，滬深三大指數昨日全線下挫。上證指數收報3324點，跌31點，跌幅0.93%；深證成份指數報10617點，跌173點，跌幅1.61%；創業板指數亦失守2200點關口，收報2182點，跌幅1.98%。

中國券商分析認為，今次座談會雖然對市場信心有正面作用，但A股自1月中起已累積升幅，市場自然會出現逢高獲利回吐嘅賣壓。而且，座談會後官方未公佈具體政策措施，市場短線未見明顯反應，後續走勢仍視乎官方會唔會進一步推出提振民企信心嘅措施。

新加坡《聯合早報》引述香頌資本執行董事沈萌分析，指從《新華社》通稿睇，會議內容仍然係老調重彈，無提出具體解決方案。佢指出，中國總理李強喺1月底已召開類似座談會，市場原本預期今次會議會有更明確嘅新政策方向，但結果未見「增量提法」。

近年嚟，內地民營企業嘅經營環境越嚟越嚴峻，除咗產權保護不足、競爭環境唔公平等長期問題，部分行業亦因監管政策收緊而受到重大影響。有分析認為，「國進民退」政策持續推動下，民營企業嘅未來發展仍然存有變數，市場會密切關注官方會唔會進一步推出實質性扶持措施。