新田科技城係北部都會區嘅重要部分。本來政府講嘅方向，係提供土地、完善基建，吸引企業投資，發展新產業。但而家提出嘅安排，係政府先向新田科技城公司注資一百億元，仲可能要自己起好產業設施，再吸引企業進駐。咁市民就要問：原本希望私人資本投資，點解變成政府先承擔咁多？按照十月十四日公布嘅建議，大約六十億元發展創科用地，三十億元加快土地平整，十億元支付公司早期營運開支。呢一百億係今年預算案已提出嘅起始資金，今次交代具體用途，唔係已經全部使晒。但文件講明，為咗吸引企業落戶，公司初期可能要自行興建產業設施。

問題就喺呢度。政府提供土地，同政府出錢起樓、承擔營運，係幾個層次嘅投入。土地本身已經有價值，再加建築成本、公司開支，公共財政承擔就進一步增加。咁企業相應承擔咗乜？有幾多真金白銀已經簽約落實？政府應該喺投入之前，將呢條數講清楚。我認為比較合理嘅次序，係先有具體產業項目。企業提出要做乜、投資幾多、需要幾大地方，政府再研究配土地、配基建，或者按比例共同投資。咁每一筆公帑，都有具體用途，亦有企業承諾支持。而家值得擔心嘅，係個次序倒轉咗：先定一大片地方做科技城，再成立公司、投入資金、起好設施，之後先等企業嚟。未有足夠訂單就先擴建工廠，做生意嘅人都知道有風險。換成政府投資，唔會因為冠上創科兩個字，個風險就消失。

數碼港就值得簡單回顧。當年政府同李澤楷旗下盈科合作，政府提供土地，發展商投入資金，項目包括後來嘅貝沙灣住宅，同科技用途嘅數碼港園區。住宅售樓收入用嚟支付項目成本，盈餘再按協議分配。即係有地產商投資，亦有住宅發展支撐整個安排。但住宅賣得成、科技園區起得成，同成功發展科技產業，係兩回事。數碼港園區二零零四年完成，之後政府仍然繼續投入資源，包括擴建。市民有理由要求一份完整交代：土地、建設同後續支援加埋，換到幾多可以持續嘅產業成果？唔可以攞物業發展嘅成績，代替科技政策嘅成績。

返到新田，我最擔心嘅係，私人投資不足，最後反而成為政府繼續出錢嘅理由。企業未肯嚟，就話設施未齊；起好設施仍然未夠吸引，就話要提供更多優惠；收入追唔上開支，又話產業培育需時，要繼續支持。如果每一次市場反應不足，答案都係政府再投入，咁究竟去到邊一步，先會重新評估原先嘅判斷？越冇人肯投資，政府越投越多，最後原本嘅招商計劃，就可能逐步變成公帑包辦嘅建設計劃。

現有資料未足以證明新田完全冇企業簽約，所以政府更加應該公開交代：邊啲已經落實投資，邊啲只係洽談，邊啲純粹表示興趣。出席活動、簽意向書，同承擔租金、設備投資、進駐期限，分別好大。政府如果要行前一步，就應該分階段投入。先做需求最明確、有企業承諾支持嗰部分；企業資金到位、項目如期推進，再開下一期。如果需求不足，就縮細規模、延後建設。唔好因為前面已經使咗錢，後面就變成一定要繼續使。

新田要交代嘅，唔止係幾時平整好土地、幾時起好幾幢樓，而係企業投入幾多、實際業務做成幾多。政府肯出土地、肯承擔資金，企業就要攞出相應承諾。否則樓宇越起越多，公帑越投越多，真正應該帶動發展嘅私人投資，卻始終未見到足夠承擔。咁就要問：我哋究竟係發展產業，定係用產業願景支持一輪又一輪工程？