根據伊朗半官方媒體塔斯尼姆通訊社報道，伊朗革命衛隊表示，為回應阿巴斯港機場附近早前遭到襲擊，伊朗已經對美國空軍基地發動打擊。革命衛隊形容，今次凌晨4時50分發動嘅攻擊，係對美方一次「嚴正警告」，並補充話，如果美國再有任何進一步侵略行動，伊朗將會作出更猛烈反擊。不過，伊朗方面暫時冇透露今次鎖定嘅美軍基地具體位置。

伊朗反擊美國目標之後，國際市場即時震盪，資金迅速轉向防守。路透社報道，布蘭特期油急升3.72%，升至每桶97.8美元；紐約WTI期油亦升3.73%，報每桶91.99美元。市場重新憂慮，霍爾木茲海峽一旦再度受到威脅，全球能源供應將會再次收緊，油價可能進一步抽升。亞洲股市方面，避險情緒明顯升溫。韓國KOSPI指數一度跌2.7%，日本日經指數下跌約1.5%，歐洲期貨亦同步下跌。金價跌約1.3%。比特幣最新報約73,020美元，較前收市跌2,495美元，跌幅約3.3%。

根據《美聯社》報道，美國總統特朗普早前喺白宮內閣會議入面，對美伊協議談判進度表達強烈信心。不過，佢同時一票否決一個關鍵替代方案，即由第三方接管伊朗濃縮鈾儲備。根據國際原子能總署最新數據，伊朗目前擁有440.9公斤、純度高達60%嘅濃縮鈾。美伊協商草案原本計劃，將呢批核原料轉移去一個同德黑蘭關係較密切嘅第三國，以此作為降低核風險嘅折衷安排。

但特朗普公開表明，佢個人絕對唔接受由俄羅斯或者中國接管呢批高度濃縮鈾。呢個表態等於收窄談判空間，因為如果美國唔接受中俄作為第三方，而伊朗又唔願意將濃縮鈾交畀西方陣營國家，咁美伊之間要搵到一個雙方都接受嘅核材料處理方案，難度就會大幅增加。

面對年底即將到來嘅國會中期選舉壓力，特朗普口頭上仍然保持強硬。佢表示「我不關心期中選舉」，並堅稱自己唔會為咗選情，而倉促簽署一份唔完美嘅協議。不過，政治現實明顯更加複雜。特朗普最初曾經表示，今場戰爭可能只會持續4至6星期，但而家已經接近第4個月。美國選民對高物價嘅不滿日益升溫，尤其係汽油價格。油價上升直接打入美國家庭日常生活，亦加重特朗普同共和黨面對嘅政治壓力，外界分析共和黨要保住眾議院控制權將會相當困難，甚至連參議院都可能面對挑戰。