根據港媒《香港01》23號報導，在美中貿易戰持續、外資大量撤離嘅背景下，香港疫情後經濟復甦不如預期，各處旺區陸續出現結業潮，消費降級嘅風暴正在暗哋席捲而來。

近日香港網上討論區有網民稱，深水埗鴨寮街出現倒閉潮。01記者在17號中秋節當日下晝到場觀察，雖然街上人流絡繹不絕，但五金舖密集區南昌街路段，其中一邊共26間舖位，就有7間舖位正在招租，空置率高達26.9%，即每四間舖位就有一間「吉舖」。

報導稱，有苦撐著嘅五金舖老細指，受淘寶等網購平台衝擊，部份顧客齋睇唔買，近月已有同業因捱唔住而執笠。有電訊舖形容，每日客量「寥寥可數」，估計同經濟差及港人集體北上消費有關。有店主被問到：會否考慮結業？老細輕嘆︰見步行步咋，都好難講。

報導指，深水埗鴨寮街係電子零件及產品嘅集散地，「鴨記」儼然成為港人心目中「平靚正」嘅代名詞。不過網上指呢個平民聖地鴨寮街，似乎都逃唔過疫後經濟衰退嘅影響，不止「吉舖」無數，殘存嘅幾間舖都疑似醞釀要出現倒閉潮。

根據報導，鴨寮街（欽州街至南昌街段）合共有138間舖位，其中14間舖位正在招租，部份未拆卸嘅招牌顯示，該批吉舖主要以五金舖為主，部份係音響店、找換店等。換言之，該路段目前空置率約為一成，可謂「十室一空」，相比尖沙咀栢麗購物大道25%嘅舖位拉閘，暫時未算太嚴重。

報導指，如果將範圍縮窄至五金舖聚集嘅北河街至南昌街路段，其中一邊共26間舖位，目前有7間舖位正在招租，空置率已達26.9%，即4間舖位便有1間結業。

有名70歲嘅老街坊 龔伯伯，雖已搬離深水埗多年，但仍會偶而專程自觀塘搭車，返到北河街街市來買餸，多年前佢已經感受到市道轉差，並出現「旺丁不旺財」現象，佢呼籲政府應多留意下呢啲現象、多為大眾諗下。

一間五金雜貨舖店主 王生表示，受淘寶等網購平台衝擊，部份客只睇唔買、生意每況愈下，隔壁舖上個月已捱唔住結業。王生表示，為應付每月8.5萬租金，佢唔請人憑一己之力，每日做足14個鐘，望利用淘寶提供唔到嘅「維修服務」，整下行李篋、電動車等，嘗試在艱難環境中殺出血路。不過 王生對未來感到悲觀，並估實體店將加速沒落。

開業40幾年嘅「正豐行」，主售項目為電訊器材，年逾60歲嘅店主 邱生見證著鴨寮街嘅滄海桑田。佢表示，上世紀80年代，街上熙來攘往，疫後卻水盡鵝飛，佢形容現時每日客量「寥寥可數」，估計同經濟不景及北上消費有關。邱生望政府再推消費券等救市措施，刺激市民留港消費。會否堅持守住間舖？邱生表示：見步行步咋，都好難講。