中國國家統計局周一（15日）公佈最新統計數據，顯示今年第二季國內生產總值（GDP）剔除物價變動後，較舊年同期增長4.7%，低過市場預期嘅5.1%，亦係過去5季以嚟最差紀錄。呢個使得實現全年5%左右嘅增長目標更加困難。

中國國務院新聞辦公室今次淨係以書面形式發佈GDP等宏觀經濟數據，可能同中共三中全會嘅召開有關。數據顯示，第一季GDP增長5.3%、第二季4.7%，上半年GDP年增長5%。《路透社》指出，官方數據低過市場預期，先前《路透社》委託分析師預測中國第二季GDP年增長達5.1%。

現階段中國經濟仍然受到房地產長期低迷、地方政府債務增加及消費疲弱等因素拖累。上半年全國固定資產投資24.54萬億元，按年增長3.9%，符合市場預期；社會消費品零售總額為23.6萬億元，按年增長3.7%，低過預期嘅4%，6月份按年增長2%，遜於市場預期嘅3.4%；全國城鎮調查失業率平均值為5.1%，按季下降0.1個百分點，按年跌0.2個百分點，31個大城市城鎮調查失業率為4.9%。

中國國家統計局表示，上半年外部環境複雜性、嚴峻性、不確定性明顯上升，但喺政策發揮作用下，經濟運作呈現「總體平穩、穩中有進」。分析人士指出，中國政府要實現全年經濟增長5%左右嘅目標，勢必要推出更多措施以提振內需。

中國經濟現時面對嘅困境好大程度同房地產有關，房地產行業一度貢獻中國GDP近25%，但自2020年當局對資金借貸劃出「三道紅線」以嚟，房企長期以嚟嘅槓桿操作頓失憑藉，導致「爛尾樓」、新屋賣唔出去、建商大量減少建案等問題接踵而至。