中國國家主席習近平將會喺5月7日至10日到訪俄羅斯，並會參加喺莫斯科紅場舉行嘅蘇聯衛國戰爭勝利80週年紀念活動。中國解放軍儀仗隊亦會出席當日閱兵儀式。呢次行程被視為中俄進一步鞏固戰略合作、深化政治互信嘅重要一步，同時都反映北京喺美中對抗加劇、全球貿易重組嘅局勢下，希望更加拉近同莫斯科之間嘅關係。

新華社公布指，習近平此行期間會同俄羅斯總統普京進行多場高層會晤，預計雙方會重申中俄關係唔結盟、唔對抗、唔針對第三方，並再一次強調要構建「命運共同體」同堅守所謂嘅「國際秩序公平正義」。

俄羅斯外交部就話，今次會晤會成為中俄推動世界多極化、國際關係民主化嘅平台。事實上，習近平同普京過去十年已經見面超過40次，單係2024年，中俄雙邊貿易額就達到2,448億美元，而中國已經連續15年成為俄羅斯最大貿易夥伴。

今次係習近平自擔任國家主席以來第11次訪問俄羅斯，象徵意義十足。除咗同普京會談之外，佢仲會參與紅場閱兵同多場紀念活動，強調中俄喺二戰期間「一齊對抗法西斯」嘅歷史連結。俄方亦形容，中俄友誼係「用鮮血建立」，並指今次訪問彰顯兩國共同維護戰後國際秩序、反對歷史被篡改嘅立場。

不過，烏克蘭總統澤連斯基就早前對俄羅斯勝利日閱兵提出警告，話俄方可能會藉機製造縱火、爆炸等挑釁事件，之後將責任嫁禍比烏克蘭，佢更加指出，喺而家咁緊張嘅情況下，烏方根本無法保證外國官員喺俄羅斯境內嘅人身安全。

喺國際層面，中俄多年嚟喺聯合國、安全合作組織、金磚國家等多邊平台保持高度協調，而今次習近平訪俄，亦被視為兩國將會喺更多層面加強合作，進一步抗衡西方影響力。