《華爾街日報》報道，中國正積極尋求同美國展開貿易談判，希望促使美國總統特朗普將對華貿易政策回復至2020年簽署嘅「第一階段」貿易協議。據悉，中方計劃作出多項承諾，包括維持人民幣匯率穩定、擴大對美投資同加強遏制芬太尼原料出口，以換取美國唔再進一步加關稅，並放寬科技出口限制。

特朗普政府新一輪關稅措施將喺星期二（2月4日）生效，對中國進口貨加徵10%關稅，而加拿大同墨西哥則要面對更高達25%嘅關稅。加墨兩國已經採取報復行動，但中國除咗喺言語上譴責，並向世界貿易組織（WTO）提出申訴之外，暫時未有實際反制措施。

《BBC》駐中國記者比克分析，面對美方加關稅，北京保持克制，可能與當前經濟形勢有關。中國經濟仍然處於低迷狀態，政府更希望提振內需，而唔係激怒美國，令局勢進一步惡化。比克指出，中國外交部同商務部已經多次公開表示，希望與美方展開談判，顯示國家主席習近平更傾向與特朗普協商，而唔係即刻採取強硬對抗措施。

另一方面，比克認為，中國有意塑造自己成為穩定可靠嘅貿易夥伴形象，以爭取成為新國際秩序核心角色。因此，當特朗普對加拿大、墨西哥甚至歐盟都威脅加關稅時，北京選擇保持冷靜，展示其喺全球貿易中嘅穩健立場。

有消息人士透露，北京認為10%關稅雖然會帶嚟壓力，但仍然喺可承受範圍內，未至於需要強硬反制。不過，特朗普喺競選期間曾表態，若成功連任，會對中國商品徵收最高達60%關稅，令形勢變得更不確定。

此外，北京政府亦考慮將短影音平台TikTok（抖音海外版）視為「商業事務」，並容許其母公司字節跳動同美國潛在買家洽談收購事宜。特朗普上星期表示，佢已經同微軟等企業討論TikTok收購計劃，希望吸引多方買家競爭出價。

另一方面，美國將新一輪關稅同芬太尼問題掛鉤，引發中國強烈不滿。中國公安部發言人喺2日表示，美方以芬太尼問題為藉口對中國輸美產品加徵關稅，中方對此堅決反對。發言人強調，中國係全球禁毒政策最嚴格、執行最徹底嘅國家之一，作為聯合國三項禁毒公約締約國，中國一直堅定履行國際禁毒義務，並積極同美國等世界各國合作。