號稱「中國版NVIDIA」嘅GPU（圖形處理器）公司「象帝先」喺8月30號召開全員會議，宣佈公司正式解散，400幾名員工一夜之間全部失業。呢間市值曾經高達150億人民幣嘅中國GPU獨角獸企業，最終難逃倒閉命運。

象帝先成立於2020年9月29號，係一間專注高效能通用同專用處理器晶片設計嘅企業，主要研發適用於伺服器、資料中心等領域嘅高效能GPU晶片。公司總部設喺重慶，並喺北京、上海、重慶、成都、蘇州等地設有研發中心。象帝先曾經揚言要做到產品效能達到國際先進水平，並廣泛應用喺AI運算、雲端運算等多個領域。不過，就喺公司似乎一片大好之際，卻突然宣佈解散。

根據內地媒體《鈦媒體》報道，象帝先管理層喺全員會議上透露，公司同投資方簽咗一份B輪5億人民幣嘅對賭協議，但最終未能達成協議條款，股東發起訴訟，公司帳戶已經被凍結。由於無資金流入，公司只好宣布全員解約，欠薪則「記喺帳上」。

公司管理層表示，未來會尋求新投資人，爭取同起訴嘅股東商討，解除帳戶凍結，並將股權資金退還畀員工。不過，具體嘅執行方案未有透露，對賭協議嘅細節亦無多講。

有知情嘅網友爆料指，象帝先其實已經拖欠員工兩個月薪金，分析認為公司應該已經燒光晒融資，剛好又遇上半導體投資低潮期，無法獲得新融資，亦無其他公司願意收購，最終只能宣佈解散。

象帝先董事長唐志敏，而家亦係中國科學院計算技術研究所嘅博士生導師，曾擔任龍芯項目負責人、海光資訊總經理兼首席科學家、中科曙光技術長，領導過龍芯一號、二號CPU同海光系列CPU等中國高端通用晶片項目，並取得唔少成功。

目前，象帝先推出過「天鈞一號」同「天鈞二號」兩款GPU產品，但市場反應冷淡，未能得到大客戶認可。喺融資燒晒又無新投資人出手嘅情況下，只能選擇解散。

至於象帝先嘅未來走向，目前仲有好多不確定性。雖然公司高層話公司而家只係進入「休眠狀態」，但係具體幾時可以復甦，點樣復甦，仲係一個未知之數。

雖然中國喺晶片領域被「卡脖子」，但北京顯然唔打算輕易放棄，繼續大撒幣妄圖彎道超車。唔少分析都警告，中國盲目擴張、巨額投資晶片公司嘅作法若唔改變，未來恐怕都只係將更多資金投入一個又一個嘅黑洞。《I》