美國總統特朗普尋日（10日）突然宣佈，將原本針對75個國家的關稅措施暫緩90日，並將互惠關稅大幅降至10%，唯獨中國就特別照顧，被大幅加徵至破紀錄的145%。曾被視為習近平智囊、被稱為中國國師嘅著名經濟學家鄭永年就指出，今次關稅之戰已經去到盡頭，老實講，只要關稅加到六、七成，之後再加幾多都無所謂，加到五倍都一樣，根本無法做生意，已經等如脫鈎了。

綜合內地傳媒報道，鄭永年強調，今次關稅風波絕不只係經濟上的角力，對好多國家嚟講，影響甚至比真實戰爭更嚴重。講到底，美國自己內部有大問題，現時美國政府幾乎逼近破產邊緣。白宮嘅諗法就係，要救美國，就一定要做番特朗普講嗰套讓美國再次偉大，否則美國可能真係會破產。特朗普今次簡直係搏命，孤注一擲，要嘛贏晒，要嘛輸光。反正美國國債愈滾愈大，還錢嘅壓力已經去到臨界點，唯有豁出去搏一鋪。

鄭永年分析，特朗普點名針對嘅國家，起碼有兩種符合佢眼中嘅肥羊條件：第一就係盟友，安全上需要依靠美國；第二種就係經濟上嚴重依賴美國市場嘅國家。當然，仲有地緣政治因素嘅考慮，最後係直指中國。所以你見到今次關稅最高嗰班國家全部都係亞洲，而稍低一級嘅就係美國嘅盟友同埋拉丁美洲國家，地緣政治嘅目的實在太明顯。

鄭永年又話，特朗普睇落好似亂出拳，但其實背後有佢一套清晰邏輯。目前睇嚟，特朗普今次係對美國進行一場休克療法，美國能唔能夠醒返就未知，但係一定要先令自己休克。鄭永年詳細解釋，特朗普嘅關稅策略有三層目的：最簡單直接嘅，當然係向外國人收錢；第二層目的係迫使製造業回流返去美國；第三層就係地緣政治嘅部署，明顯就係針對中國，而中國對呢點睇得非常之透。

鄭永年仲提到，中國面臨嘅根本唔係短缺問題，而係點處理產能過剩。美國唔買中國嘅貨，中國都仲可以諗辦法搵其他地方賣。但係美國就大鑊好多，因為美國根本冇生產中低端貨品嘅能力，而呢啲貨品同美國市民嘅日常生活息息相關，隨時會引發嚴重通脹。鄭永年特別強調，關稅戰已經係去到盡頭，坦白講，只要關稅一超過六、七成，再加到五倍十倍都冇分別，生意根本無法做，脫鈎已經係定局。《I》