烏克蘭媒體《基輔獨立報》報道，最近幾個月，烏克蘭大幅增加使用自製無人機，專攻俄羅斯嘅關鍵基礎設施。烏軍成批無人機同時出動，搞到俄羅斯嘅防空系統應付唔來，受損嚴重。

自從俄羅斯全面入侵開始，無人機成為烏克蘭嘅關鍵武器。烏克蘭政府加大對國內無人機生產嘅投資，並提供資助同簡化程序，鼓勵無人機生產。9月初以嚟，烏克蘭已經對俄羅斯發動咗兩次大規模攻擊。根據俄羅斯官方消息，其中一次使用咗至少144架無人機，而另一次更加達到158架。

歐洲智庫RAND Europe國防安全專家Mattias Eken表示：「儘管俄羅斯嘅防空系統能力強大，但喺保護所有目標上始終有其限制。」佢話：「烏克蘭嘅策略係要向俄羅斯人展示，國家嘅防禦能力有漏洞，暴露俄國嘅脆弱點。」

華盛頓新美國安全中心（CNAS）高級研究員Samuel Bendett表示：「如果烏克蘭能持續壓力俄羅斯嘅工業同軍事設施，會對俄羅斯嘅戰爭策略產生重大影響。」，佢指出烏克蘭利用多種類型無人機進行聯合遠程攻擊，增加咗俄方防禦嘅難度。

同時，差唔多有20個國家組成咗無人機聯盟，幫助烏克蘭增強無人機嘅庫存。喺今年3月，烏克蘭數碼轉型部部長Mykhailo Fedorov話，烏克蘭嘅無人機市場已經擴展到每年可以生產過百萬，甚至兩百萬架無人機，當然，呢啲成就亦有賴國際合作。

隨住烏克蘭加大無人機嘅生產，俄羅斯嘅防空系統顯得越嚟越脆弱。烏克蘭最近嘅攻擊目標包括油廠、空軍基地同彈藥庫。成批無人機夜襲俄羅斯大面積嘅領土，令俄國嘅防空系統無法全面覆蓋。

Eken表示：「大量使用無人機對俄羅斯防空系統造成咗極大壓力，令佢哋防守疲憊。更重要嘅係，無人機成本低過攔截導彈，咁樣令俄國陷入消耗戰。」佢指出，烏克蘭策略性使用遠程無人機攻擊，對莫斯科嘅防禦規劃造成難題，「俄羅斯嘅戰術雷達設計係用嚟偵測戰機嘅，但對於細小、慢速移動嘅無人機，偵測效果就唔係咁好。」

俄羅斯防空系統例如Pantsir S1、Tunguska同Strela，通常只有當無人機接近到3至4公里內先可以偵測到，呢個距離已經係導彈攔截嘅最小有效範圍。

為咗應對烏克蘭無人機，俄羅斯軍隊嘗試重新調整佢哋嘅防空部隊。Bendett指出，俄羅斯依家開始模仿烏克蘭嘅策略，推出機動防空單位，使用大口徑機槍同輕型防空炮安裝喺卡車同吉普車上，作為應對無人機嘅「長期方案」。

Bendett指出，好多俄羅斯評論員對政府應付唔到呢種威脅。感到極度不滿。佢哋要求政府效仿烏克蘭，設立志願者巡邏隊，用聲音同視覺信號監測無人機。不過Eken指出，呢個方法需要軍隊同社會之間嘅合作，而俄羅斯目前並未具備呢種條件。

Eken認為，俄羅斯可能需要升級雷達技術，加入光學同聲學偵測系統，先至可以有效應對愈來愈多嘅無人機。另外，無線電干擾技術亦可能成為一個重要嘅解決方案。

當俄羅斯努力提升防空能力嘅同時，烏克蘭就宣布成功測試自家生產嘅彈道導彈，仲展示咗一款名為「Palianytsia」嘅無人機導彈。雖然專家認為呢款無人機未必會即時改變戰場形勢，但佢哋強調，呢款無人機可以像導彈一樣調整目標同飛行路徑，增加攻擊嘅靈活性。《I》