隨住美伊兩週臨時停火協議就到期，而美國總統特朗普日前先話「極不可能延長停火」，但最後關頭突然又不出意料地「轉軚」，佢透過社交平台 Truth Social 宣佈，將會「無限期」延長同伊朗嘅停火協議。不過，佢同時強調美軍會繼續封鎖霍爾木茲海峽，直到伊朗拎出一份「統一嘅和平方案」為止。德黑蘭方面反應冷淡，甚至有軍方高層直言呢種做法係「爭取時間發動突襲」。

特朗普喺週二（21號）下晝嘅表態，同佢朝早接受 CNBC 訪問嗰陣嘅強硬口吻截然不同。佢早前仲話：「如果聽日未有協議，我極大機會會重啟轟炸，因為帶住呢種態度去談判反而更好。」但到咗下晝，佢就改口話係應巴基斯坦總理沙里夫（Shehbaz Sharif）嘅請求，為咗留個位畀外交努力，決定延長停火。

特朗普喺貼文入面仲「抽水」，話伊朗領導層內部「嚴重分裂」，需要更多時間去達成內部共識，先至可以交出一份終止同美國及以色列戰爭嘅提案。佢表示：「我已經指示我哋嘅軍隊持續封鎖港口，喺其他方面保持戰備狀態，並延長停火，直到佢哋提交方案並完成討論，無論結果係點。」

雖然宣佈咗延長停火，但原本預定去巴基斯坦參加第二輪和談嘅副總統萬斯（JD Vance）就突然取消行程。白宮官員證實，萬斯暫時唔會出發去伊斯蘭堡，令外界質疑呢場所謂嘅「和平進程」係咪已經名存實亡。

巴基斯坦總理沙里夫隨後喺 X 平台發文，感謝特朗普接受請求，並希望雙方可以喺伊斯蘭堡達成全面嘅和平協議。不過，談判枱嘅另一邊——伊朗，似乎完全冇咁嘅打算。

伊朗官媒塔斯尼姆通訊社（Tasnim News Agency）喺 22 號凌晨發表聲明，指伊朗根本冇要求過延長停火。伊朗伊斯蘭議會議長嘅顧問更加喺社交媒體反擊，指特朗普嘅提議「毫無意義」，直言「輸家冇權設定條件」。佢認為，持續嘅海上封鎖其實同軍事轟炸冇分別，必須以軍事手段回應。

伊朗武裝部隊中央司令部發言人亦發出警告，指伊朗軍隊已經進入「百分之百戰備狀態」，隨時準備開火，並稱伊朗先至係戰場上嘅勝利者，因為佢哋依然控制住全球能源命脈——霍爾木茲海峽。

受到局勢不明朗影響，國際油價震盪劇烈。布蘭特原油（Brent crude）價格原本喺 95 美元水平浮動，但隨住特朗普宣佈「無限期停火」但「維持封鎖」嘅消息傳出，市場擔心霍爾木茲海峽嘅航運限制會持續，油價隨即飆升至接近 100 美元大關。