特朗普喺美國時間11月8日接受CNN電話訪問，話只要同伊朗嘅談判有進展，美國再發動攻擊嘅可能性就好低，但要睇伊朗肯唔肯簽一份「好強力嘅協議」。佢同時聲稱，美軍已經鎖定伊朗境內嘅基建目標，包括38座橋，可以一個鐘內打落嚟。呢番說話一方面保留軍事威脅，另一方面亦為暫停攻擊留低政治空間。

談判而家卡喺邊度？路透社引述伊朗高級官員話，德黑蘭已經經卡塔爾向美方交咗核問題方案，但要求美國先處理放寬制裁、解凍資產同戰爭賠償等條件。華盛頓就堅持，一開談就要談核問題。國務卿盧比奧同日亦話，談判距離突破仲有一段路。雙方連邊一步先行都未傾掂。

但特朗普面對嘅時限，已經由華盛頓開始倒數。中期選舉完咗，民主黨奪回眾議院，表明會優先推動結束對伊朗嘅戰事。特朗普自己承認，伊朗戰爭係共和黨敗選嘅原因之一。副總統萬斯講得更直接，話共和黨輸就係因為場仗。連自己嘅副總統都咁講，共和黨議員再支持擴大戰事，就要向選民交代點解仲值得打落去。

壓力唔使等到明年1月3日先出現。 眾議院6月已通過撤軍決議，參議院6月23日亦以50票對48票通過同一份共同決議，要求撤出參與對伊敵對行動嘅美軍。呢次表決早喺中期選舉之前，決議本身嘅法律執行力有爭議。9月24日，另一份同類決議喺參院以49票贊成、50票反對落敗，但仍然有4名共和黨參議員支持。共和黨內有人同白宮劃清界線，選前已經有票可數。

更實際嘅係戰費。五角大樓10月底交畀國會嘅估算，戰爭成本已超過470億美元，單係補充用咗嘅彈藥就約290億。五角大樓要求約670億美元追加撥款，選前已經擱住，暫未見國會批出呢筆追加戰費。明年1月3日新一屆議員任期開始，就算兩院通過有法律約束力嘅聯合決議，特朗普仍然可以否決，國會兩院各要三分之二先推翻到。但否決得一份決議，攞唔到一筆撥款。白宮要打持久戰，始終要返國會搵票。

市場方面，油價對呢番說話嘅反應最直接。11月9日亞洲早市，布蘭特期油跌約1%至每桶97.37美元，紐約期油跌約0.5%至90.37美元。同期現貨金反而微升約0.2%，報每盎司4,075美元，美元指數約102.2。上周五美國收市，10年期美債息約4.86厘，升約2個基點，VIX就由28.18回落至25.64。油價反映市場調低短期再打嘅風險，美元同債息就同時受美國就業強過預期、加息預期升溫影響，VIX回落亦有科技股反彈嘅成分。要睇戰事風險有冇持續下降，仲要睇霍爾木茲海峽有幾多商船實際過到。

我嘅判斷係，特朗普短期內就要搵方法收兵。佢而家講「強力協議」，有一部分係跌落地執返拃沙，要向國內交代軍事壓力換到乜。佢可以先爭取一項做到嘅安排，例如國際原子能機構可以查邊個設施、核對邊批核材料，核實之後美方幾時放寬邊項制裁。1月3日係國會換屆嘅日子，特朗普嘅政治限期可能更早。 到時睇佢交唔交得出第一步可以核查嘅成果。