電影《沽注一擲》（The Big Short）主角原型、2008年金融海嘯前沽空按揭證券一戰成名嘅對沖基金經理貝瑞（Michael Burry），一直指控大型雲端服務商將GPU使用年期假設拉長，人為壓低每年折舊開支。不過，英偉達（Nvidia）雲端運算夥伴CoreWeave最新披露嘅合約，令貝瑞論點受挫；佢隨即轉移火力，狠批英偉達新公佈嘅5,000億美元（約3.9萬億港元）融資平台係「華爾街把戲」，同2008年引爆金融危機嘅高風險債務模式如出一轍。

CoreWeave行政總裁英特雷特（Mike Intrator）8月10日喺第二季業績電話會議透露，公司已就英偉達2020年推出嘅A100 GPU簽咗一份延續至2029年嘅合約，屆時呢款Ampere架構產品面世將達九年，遠超大型雲端商主張嘅六年折舊年期。CoreWeave第二季收入按年急增112%至25.8億美元（約201億港元），未完成訂單達1,040億美元（約8,110億港元），仲未計7月以嚟新增逾250億美元（約1,950億港元）承諾。英特雷特話，Blackwell同Vera Rubin新產品嘅定價同毛利率正創新高，舊世代產品定價亦維持喺數年前水平或以上。業績公佈後，CoreWeave股價一度急升逾一成。

貝瑞去年11月指控，超大規模雲端商將GPU使用年期拉長至五、六年，令2026至2028年間少計1,760億美元（約1.37萬億港元）折舊，但英偉達幾乎每年推出新架構晶片。英特雷特當時接受CNBC訪問回應，一批H100合約到期後隨即以原價95%重新簽約；英偉達首席財務官克雷斯（Colette Kress）亦反駁，話六年前售出嘅A100至今仍滿載運作。科技媒體Tom’s Hardware分析指，舊GPU有價有市同電力基建錯配有關：新一代GB200機櫃耗電高達120至140千瓦兼需液冷，舊機房根本容納唔到，令A100留喺原有設施繼續出租反而划算。

另一邊廂，英偉達8月10日宣布同阿波羅（Apollo）、貝萊德（BlackRock）、黑石（Blackstone）、博楓（Brookfield）、高盛（Goldman Sachs）同KKR簽署諒解備忘錄，建立獨立融資平台，目標長遠動員逾5,000億美元第三方資本，投入數據中心、晶片廠房同電力等AI基建，英偉達並可按個別項目為晶片殘值提供最多25%支持。行政總裁黃仁勳（Jensen Huang）形容，科技晶片首次成為可投資資產類別；貝萊德行政總裁芬克（Larry Fink）更將計劃比作1970年代按揭證券嘅誕生。貝瑞周三喺社交平台X發文反擊：「呢場5,000億美元嘅華爾街把戲，涉及英偉達持有25%權益，並為購買其晶片提供殘值擔保，全部經私募股權嘅私人信貸機制過濾……新老闆登場，其實同舊老闆無分別。」佢並喺Substack專欄透露，8月11日起加碼沽空英偉達，警告市場表外負債令2000年同2008年「相形見絀」。計劃公佈後英偉達股價不升反跌，「循環融資」疑慮未散；英國央行早前亦警告，高槓桿AI企業一旦受衝擊，隨時波及全球融資環境。