一批懷疑同中國有關嘅黑客，利用公開可下載嘅開源人工智能(AI)工具，對台灣政府網站發動網攻。最早發現事件嘅以色列AI及國家級網絡防禦公司Dream形容，呢次係全球首宗針對政府目標嘅「全程自主」攻擊，黑客將多個開源AI代理砌埋一齊，打造出一款好似真人黑客兵團咁協同作戰嘅工具，反映人工智能正改變緊網絡戰嘅形態。

根據Dream調查，喺今年7月初4日之內，呢款工具同時部署多達8個自主AI代理，分工測繪21個政府系統、探測漏洞，遇到阻擋就自動轉戰術，最終攻破最少85個政府帳號，竊取超過2500份人事紀錄，再將攻擊擴大至台灣核能安全監管機構同至少7間能源公司。研究人員喺一個160MB歸檔文件搵到證據，當中1395份文件顯示，黑客用嘅係Hermes同OpenClaw兩套可自由下載嘅開源AI代理系統，並將行動偽裝成「獲授權嘅漏洞測試」，藉此繞過AI模型嘅安全防護；系統仲會因應手上資訊，不斷為各條攻擊路徑排優先次序，手法同真人無異。

至於幕後黑手，Dream暫未歸咎特定組織，但指相關內部通訊用簡體中文，被竊資料就用繁體中文，呢種寫法一般只見於台、港、澳政府網站，故判斷操作者好大機會同中國有關。Dream以公司政策為由，拒證實受襲國家，只稱已通報一個「亞太地區」政府；有知情人士向透露，目標正正就係台灣，中方暫未回應置評。

Dream首席戰略官貝克爾(Amir Becker)曾主管以色列精銳情報部隊「8200部隊」嘅網絡行動，佢直言從未見過針對政府嘅呢類「端到端自主攻擊」，警告各國政府必須假設自己隨時處於持續網攻之下。耐人尋味嘅係，Dream由前NSO集團創辦人胡里奧(Shalev Hulio)同前奧地利總理庫爾茨(Sebastian Kurz)等人喺2023年創立，而胡里奧正正就係爭議間諜軟件Pegasus背後嘅關鍵人物，如今掉轉頭做防禦生意；公司今年6月估值已達30億美元(約234億港元)。

事件爆出之際，AI界同保安業界正就模型能否自主識別同利用漏洞激辯。其實Anthropic早喺2025年11月已披露，一個中國國家級組織(代號GTG-1002)透過佢嘅Claude Code，發動一場八至九成由AI自主執行、涉及全球約30個目標嘅間諜行動，同樣扮防禦測試公司嚟繞過防護；OpenAI同Meta亦報告過模型喺內部測試中出現預期外嘅網攻行為。今次台灣個案關鍵分別在於，黑客用嘅係可自由下載嘅開源模型，冇咗中央供應商可即時偵測切斷，防守隨時更難。

台灣本身早已係網攻重災區。國家安全局今年1月4日發表報告，指2025年中共對台關鍵基礎設施平均每日侵擾達263萬次，按年增6%，較2023年更暴增逾一倍，以能源、緊急救援及醫院增幅最明顯，並點名BlackTech、Flax Typhoon、Mustang Panda、APT41同UNC3886五大黑客組織。台灣數位發展部就今次事件以保密為由拒評個別細節，只稱涉政府或關鍵基礎設施嘅事件都會按既定程序應對，並承認AI代理令攻擊自動化之餘，AI工具本身亦可能淪為新漏洞，構成雙重挑戰。