第11夜！美軍再轟伊朗　霍爾木茲封鎖未解反向紅海擴散？

113人捲入TOPIK作弊案：真正失守嘅唔只係考場 而係成條資格認證鏈

豪花300億「愈學愈蠢」？ 美校園數碼化廿年變災難

嚴防中共又斷纜 藍綠白世紀妥協 ！ 星「鏈條款終」過關

前首富衰收尾？ Bill Gates無視員工警告 四年見孌童斯坦30次！ 由微軟創辦人Bill Gates出任主席嘅Bill Gates基金會，美國時間週二公佈一份外部調查摘要，證實Bill Gates本人連同基金會職員，喺2011至2014年間與已定罪性罪犯愛潑斯坦 (Jeffrey Epstein) 會面約30次，期間有員工明確表達過合作帶嚟嘅聲譽風險，惟雙方接觸並無因此叫停。 調查由美國律師事務所WilmerHale負責，會面地點包括愛潑斯坦位於曼哈頓嘅大宅，亦有一次喺基金會總部進行。調查未有發現基金會曾向愛潑斯坦付款或涉及違法行為；基金會週二只發表三頁摘要，未表明會否公開報告全文。WilmerHale同時承認，歷時五個月嘅調查並唔包括Bill Gates嘅私人通訊，亦唔涵蓋佢以個人身份同愛潑斯坦嘅往來。 報告披露，二人喺2011年經一名同時服務基金會同Bill Gates私人辦公室嘅顧問引薦認識，當時距離愛潑斯坦2008年就招攬未成年少女賣淫認罪僅三年。愛潑斯坦其後建議Bill Gates設立滙集富豪捐款嘅全球公共衛生慈善基金，2014年12月更喺其寓所安排早餐會，撮合Bill Gates同潛在捐款人；Bill Gates事後認定對方誇大咗捐款人嘅意願，計劃告吹。另一方面，愛潑斯坦2012年將時任國際和平研究所 (International Peace Institute) 主席羅德拉森 (Terje Rød-Larsen) 介紹畀Bill Gates，基金會翌年就同該機構簽訂涉及消滅小兒麻痺症嘅撥款協議；羅德拉森2020年因被揭同愛潑斯坦關係密切而辭職。調查強調，Bill Gates全程知悉愛潑斯坦嘅性罪行前科，亦一直有聽到員工嘅憂慮。 基金會行政總裁蘇茲曼 (Mark Suzman) 回應指，董事會已通過措施加強審查程序同風險管理，強調機構嘅工作「有賴誠信、有賴贏得並維繫夥伴嘅信任」。Bill Gates本人喺司法部陸續公開嘅愛潑斯坦檔案中榜上有名，佢一直否認知悉對方性侵少女嘅罪行；上月10日，佢喺眾議院監督委員會閉門作供近六小時，形容同愛潑斯坦會面係「嚴重判斷錯誤」，強調自己「從未傷害任何人」，亦從未目睹或察覺對方持續犯罪。愛潑斯坦2019年因聯邦性販運未成年人等控罪候審期間，喺紐約獄中身亡。 事件對Bill Gates嘅衝擊持續發酵。長期注資基金會嘅「股神」巴菲特本月14日公佈今年度捐款安排，向四個同其家族有關嘅基金會捐出約60億美元（約468億港元），首次剔走Bill Gates基金會，並表明餘下市值逾1,400億美元（約1.09萬億港元）嘅巴郡股份，會喺2034年底前全數捐出。現年95歲嘅巴菲特解釋，決定主要係基於三名子女已有能力管理佢嘅財產，多過因為Bill Gates同愛潑斯坦「令人反感」嘅交往；但佢3月受訪時已承認，自檔案曝光後就再冇同Bill Gates交談，呢個決定亦有違佢2006年向Bill Gates夫婦作出「不可撤回」每年捐贈嘅承諾。