美國推動校園數碼化超過20年，豪擲重金將手提電腦同平板電腦送入課室，惟呢場世紀教育實驗近月遭全面清算。單計2024年，全美已投放逾300億美元（約2,340億港元）採購校園裝置；但神經科學家霍瓦斯（Jared Cooney Horvath）今年1月15日喺參議院商務委員會聽證會作證直言，Z世代已成現代史上首個核心認知測試成績低過父母一代嘅世代，注意力、記憶、閱讀同運算能力全線下滑。佢一句「科技一入教育，學習就下滑」隨即爆紅，C-SPAN聽證片段觀看次數接近300萬。
呢場實驗源自2002年嘅緬因州。時任州長安格斯·金（Angus King）推出全美首個全州性手提電腦計劃，向243間中學嘅七年級生派發1.7萬部蘋果手提電腦，至2016年累計達6.6萬部。有研究早喺2017年已報導，計劃推行15年，全州測試成績毫無寸進，繼任州長勒佩奇（Paul LePage）直斥係「巨大失敗」。霍瓦斯引述國際測試數據指，學生喺學校用電腦時間愈長，成績往往愈差；有研究觀察3,000名大學生更發現，佢哋用電腦嘅時間近三分之二同課業無關。霍瓦斯強調，有效學習從來唔輕鬆，困難同不適感正正係令知識更深刻嘅關鍵。不過亦有學者持異議，德州大學奧斯汀分校經濟學者伯格曼（Peter Bergman）就認為，呢啲數據只屬相關性，好難斷定因果。
爭議近月更燒入法庭。今年3月，洛杉磯陪審團裁定Meta同Google，須為一名自幼沉迷社交平台嘅20歲女子承擔責任，合共賠償600萬美元（約4,680萬港元），係歷來首次有陪審團認定平台「成癮式設計」構成傷害，TikTok同Snap則趕喺開審前和解。到5月，肯塔基州布雷西特縣（Breathitt County）學區嘅指標性訴訟入面，Meta、TikTok、Snap同YouTube先後和解，四平台據報合共支付約2,700萬美元，避過陪審團審訊；惟全美仍有逾1,200個學區提出類似訴訟，多個州檢察總長控告Meta嘅案件亦排期8月喺奧克蘭開審。政策層面，截至去年底，全美已有35個州連同華盛頓特區，就學生使用手機立法或訂立政策，當中26個州實施校間時間全日禁令，加州新例更喺本月1日正式生效。霍瓦斯總結指，呢一代學生學習力流失，係「政策失誤」而非「個人失敗」，佢哋只係一場失敗教育實驗嘅受害者。
