台灣立法院三讀通過《電信管理法》第36及95條修正案，外界稱為「星鏈條款」，為美國富豪Elon Musk旗下SpaceX嘅衛星互聯網服務星鏈（Starlink）來台掃除最大法律障礙。喺長期藍綠對立嘅立法院，民進黨今次罕有同國民黨、民眾黨達成共識，法案毋須表決即告通過，稍後交總統賴清德簽署生效；目標係一旦同中國爆發衝突、海底電纜被切斷，台灣依然保得住對外通訊。
現行法例要求，設置使用電信資源嘅公眾電信網絡業者，董事長必須具中華民國國籍，外資直接持股上限49%，連同間接持股合計不得超過60%，呢啲門檻令星鏈多年嚟不得其門而入；星鏈2021年曾同台灣監管機構談判，因堅持全資經營而告破裂。修例後，以衛星通訊技術營運嘅業者，經主管機關按國家安全、網絡安全、市場競爭等七大因素逐案審批，可獲豁免相關限制。立法院同時通過附帶決議，要求當局將地面接收站設喺台灣境內、數據在地儲存，列為審批重要考量。
台灣冇自家低軌衛星，對外通訊高度依賴海底電纜，呢個弱點早比中共睇穿，就係2023年2月，連接馬祖嘅兩條海纜先後被切斷，離島通訊癱瘓咗幾個星期。中華電信近年已同歐洲衛星商Eutelsat OneWeb等簽署備援協議，唯獨欠咗雄霸全球嘅星鏈。提案嘅國民黨立委黃健豪形容，修法係台灣「邁向國際衛星通訊新時代、建構數碼韌性國家」嘅關鍵一步；佢早前更直言，若兩岸開戰、中共切斷所有海纜，台灣必須仍有可用而安全嘅通訊網絡。民進黨立委林俊憲亦話，衛星通訊可大大提升通訊安全同韌性。
烏克蘭經驗係今次修法嘅重要借鏡星鏈喺俄烏戰場一直係烏軍前線通訊命脈。不過，台灣朝野對過份依賴馬斯克並非冇戒心：佢曾承認拒絕為烏軍偷襲俄羅斯艦隊嘅行動提供星鏈訊號；佢喺中國有龐大Tesla業務，過往更曾倡議台灣成為中國「特別行政區」，一度觸怒島內。美國資深記者伍德沃德（Bob Woodward）著作亦據報披露，俄羅斯總統普京曾應中國國家主席習近平要求，游說馬斯克唔好喺台灣開通星鏈。
分析認為，修法只係打開大門，個波而家喺馬斯克嗰邊：SpaceX暫未公開回應，星鏈據報過往亦表明台灣並非優先市場。台北智庫中華戰略前瞻協會研究員揭仲指，現有OneWeb服務戰時大概只夠支撐核心軍事同部分政府機關通訊，引入更多選擇係當務之急。國民黨立委葛如鈞就話，目標係令衛星服務多元化，台灣應該接得通任何衛星星座。
