根據入境事務處數字，內地五一黃金周，即5月1日至5日期間，本港各個出入境管制站合共錄得超過562.2萬總出入境人次，少過入境處早前預計嘅600萬人次。不過，內地訪客入境人次就超過101.1萬，反而多過當局早前預計嘅98萬人次；至於出境嘅本港居民，就超過150.4萬人次。

5月2日係訪港內地旅客出入境高峰，當日有超過26.3萬人次入境，亦有超過25萬人次出境。而黃金周首日，即5月1日，就有最多本港居民出境，單日超過43萬人次；最多本港居民回港嘅日子就係5月3日，錄得超過48.1萬人次。

今個黃金周期間，大批內地旅客去到西貢郊野地帶遠足同露營。有立法會議員認為，大部分旅客都守規矩，但亦承認現場有良莠不齊嘅情況，坦言部分旅客需要再教育。有保護團體就表示，如果旅客喺網上分享採捕海洋生物嘅「戰利品」，可能會引發模仿效應，擔心會導致海洋資源枯竭。

西貢東壩一帶喺黃金周首日有大約5,700人次到訪，漁護署網站顯示，昨日早上11時人流情況仍然繁忙。西貢浪茄灣、西灣同鹹田灣嘅營地，連日嚟都有好多內地旅客露營。新界東南立法會議員方國珊喺一個電台節目表示，據佢觀察，鹹田灣有200至300個帳篷，但現場洗手間未能應付人流，有個別旅客要排隊等20分鐘。佢又指出，營地亦有垃圾堆積，政府要調派西貢、將軍澳或者沙田等地嘅清潔人手，前往偏遠海灘處理垃圾，形容人手編配相當吃力。

方國珊續稱，公廁興建成本唔低，認為政府要加快考慮引入收費，同時增加更多洗手間、清潔食水等基本設施。佢強調，收取嘅費用係用嚟改善旅遊設施，唔係為收費而收費。至於有內地旅客被指破壞環境，方國珊表示，現場主要係較年輕同高學歷嘅旅客，認為大部分人都有聽從勸喻，但佢亦認同現場確實有良莠不齊嘅情況，部分旅客需要加強教育。

西貢區議員張美雄喺同一個節目表示，黃金周第二日中午佢喺鹹田灣見到帳篷唔算好多，亦「未係好多人」，但到黃昏左右，人流就開始逐漸增加。佢話，有內地旅客表示，通常會留宿一晚，翌日離開，到同日傍晚下一批旅客又會再到。佢留意到，漁護署有派員向每個帳篷入面嘅人派單張同作出勸喻，但黃昏後人流太多，難以逐一勸喻。佢又話，內地旅客「好守規矩」，會排隊，亦會包好垃圾先棄置。

另外，有內地旅客懷疑喺西貢火石洲海域潛水之後，採捕海膽食用，並將相關片段或者相片放到社交平台分享。世界自然基金會香港分會代理海洋保育主管彭莉恩喺另一個節目表示，即使個別人士採捕少量海洋生物，表面睇好似無傷大雅，但一旦有網民分享所謂「戰利品」，就好容易引發模仿效應。如果有多名旅客同一時間過量採捕，可能會導致海洋資源枯竭，嚴重破壞生態平衡。

方國珊就指出，火石洲海岸範圍目前並未納入海岸保護區，未來值得加強宣傳，清楚提醒市民同旅客，喺特定範圍內唔應該採捕，亦唔應該取走海洋生物。