金管局公布，外匯基金2026年第一季投資收入錄得345億元，但按年大跌56%，按季亦跌34%。當中股票投資表現拖累整體回報，尤其港股投資錄得50億元虧損，而債券投資收入亦按年減少39%，降至246億元。

首季股票投資整體錄得虧損，其中港股蝕50億元，已經連續兩個季度見紅，虧損較上一季再擴大超過19%；按年比較更由盈轉虧，因為去年同期其實賺164億元。至於其他股票方面，上季蝕110億元，扭轉去年第四季賺153億元的情況，按年計虧損更擴大接近3倍。

不過，債券同外匯投資收入幫手抵銷部分股票虧損。上季債券投資收入有246億元，但按季跌18%，按年跌39%；外匯投資收入就有259億元，按季升超過兩倍，按年亦升99%。同一時間，外匯基金期內支付58億元畀財政儲備，另外支付29億元畀特區政府基金同法定組織。

金管局副總裁李達志表示，第一季期間因為伊朗爆發衝突，金融市場出現大幅波動。佢指出，債息上升代表債價下跌，對投資者嚟講係一個挑戰，而股市喺第一季內亦出現下跌，「而且絕大部分跌幅都係集中喺三月份發生」。

李達志又話，第一季美元整體對大部分貨幣都係下跌，變相外匯基金持有嘅外幣資產升值，為投資帶來一定正面嘅匯兌收益。佢進一步解釋，債券方面雖然價格下跌，但由於美債同其他先進市場債券仍然提供一定利息收入，可以抵銷部分債價跌幅，所以債券收入仍然錄得246億元。不過，無論係香港股票定全球股票，第一季都係錄得負數。

李達志總結話，整體嚟講第一季外匯基金仍然錄得345億元正回報，「當然如果同去年比較，平均每季計係冇去年首季咁高，但亦反映出今年三月份係一個極具挑戰嘅月份」。

至於第二季展望，金管局總裁余偉文被問到時表示，第一季因為中東衝突，股市同債市表現好似過山車咁波動。踏入第二季，雖然4月市況有改善，但仲有兩個月時間，加上中東局勢後續發展、對油價甚至通脹嘅影響仍然未明，因此第二季存在「十分大不確定性、十分大不明朗性」。

余偉文指出，現階段難以預測外匯基金今季投資表現，但金管局可以做嘅係保持高機動性同防禦性，繼續推動投資組合多元化，同時會較以往維持更高流動性。「始終環球市場波動大，我覺得防禦性同流動性係重要。」