AI新創公司Anthropic正準備衝擊市場估值新高。根據CNBC等外媒報道，Anthropic正同投資者洽談新一輪融資，目標估值高達9,000億美元。如果最終成事，將會超越競爭對手OpenAI目前約8,500億美元嘅估值，成為AI行業估值最高公司之一。

市場之所以對Anthropic咁高估值，核心係佢嘅增長速度極為誇張。相比之下，OpenAI喺2026年3月先完成一輪1,220億美元融資，引入包括亞馬遜、輝達同軟銀等策略投資者，估值大約去到8,520億美元。而Anthropic喺2026年2月估值仲只係3,800億美元，但短時間內市場已經將佢重新定價至8,000億甚至9,000億級別，反映資本市場對佢增長模式高度追捧。

收入層面更加關鍵。Anthropic旗下模型Claude，以編碼能力見稱，深受企業客戶歡迎。公司年化收入已由2025年底約90億美元，急升至2026年4月約300億美元，幾個月內增長超過三倍。同時，每年花費超過100萬美元嘅企業客戶已經超過1,000間，顯示佢已經成功切入高價值企業市場。

產品層面亦持續推進。Anthropic月初推出最新模型Claude Opus 4.7，並聲稱係目前面向大眾市場最強產品之一。市場同時盛傳，佢尚未發布嘅新模型Mythos性能極高，甚至因為漏洞偵測能力太強，可能帶來網絡攻擊風險，目前只向資安、科技同金融等少數合作夥伴開放測試。

不過，高速增長背後，最大問題其實係算力。市場一直流傳Anthropic面對算力瓶頸，而公司已經開始用資本硬解。今個月，Anthropic同亞馬遜達成協議，對方將追加投資最高250億美元。Anthropic亦承諾未來十年會向AWS投入超過1,000億美元，換取高達5GW算力，用於訓練同運行Claude，並採用亞馬遜自家晶片Trainium。同時，公司亦計劃向Google同博通採購另外5GW算力，預計2027年開始上線。

相對之下，OpenAI嘅情況開始出現變化。公司目前年化經常性收入大約250億美元，雖然規模仍然龐大，但增長速度已經明顯放慢。更關鍵係，佢已經唔再係行業第一——Anthropic已經喺2026年4月以300億美元年化收入首次反超。要留意，Anthropic喺2025年底仲只係90億美元，短時間內爆發式增長，背後成本卻只係行業龍頭約四分之一，意味住佢用更少資源做到更高增長，直接挑戰整個AI行業「燒錢換領先」嘅基本邏輯。

內部壓力亦開始浮現。據報道，OpenAI財務總監對公司支出規模表達嚴重憂慮。目前公司已承諾嘅算力採購總額接近一萬億美元，其中最大一筆係同甲骨文公司簽訂嘅五年3,000億美元雲計算合約，預計2027年開始交付。問題在於，如果收入增速跟唔上呢啲天文數字支出，公司將面對巨大現金流壓力，甚至可能出現履約風險。

更深層問題係上市時間分歧。市場傳出，管理層內部對IPO時間未有共識。行政總裁（CEO）傾向喺2026年第四季上市，但財務總監（CFO）認為公司關鍵財務指標未達標，建議延遲至2027年。雖然公司對外否認相關報道，但市場普遍認為，當一間估值數千億但未盈利嘅公司，連上市時機都未能統一意見，本身已經係一個風險訊號。

至於增長放慢嘅原因，其實唔難理解。第一，企業客戶採購模式改變，越來越多公司唔再直接向AI供應商購買，而係透過雲平台，例如亞馬遜同Google，用多模型方式選擇最具性價比方案，令原本嘅渠道優勢被削弱。第二，市場競爭急劇升溫，OpenAI喺全球聊天機械人市場份額已由兩年前超過七成，跌至2026年第一季約42%；Google約佔24%，而Anthropic已經去到14%，而且增長最快，特別係企業軟件開發領域。

第三個亦係最關鍵嘅結構問題：AI服務成本下降速度，可能快過收入增長。尤其係中國開源模型，性能已接近頂級，但價格只係龍頭公司七分之一甚至更低，意味整個行業正進入價格戰。當競爭對手可以用你七分之一成本提供接近質素服務，高價策略就會開始崩潰，而成本最高嘅公司將首先受到衝擊。

總結嚟講，呢場AI競賽已經由「技術領先」轉向「商業模式對決」。Anthropic代表係高效率、低成本爆發式增長，而OpenAI代表係重資本、高投入路線。問題唔係邊間公司技術更強，而係邊一個模式，可以喺價格戰同算力戰入面生存到最後。