美國戰爭部負責政策事務嘅副部長科爾比（Elbridge Colby）周四喺網上記者簡報會表示，正在審查嘅新核戰略並非旨在強調動用戰區級核武，而係要透過設定明確門檻，嚇阻其他國家使用核武；佢同時解釋，美軍六月將印太司令部復名為太平洋司令部，正正反映美軍嘅戰略重點確實在於第一島鏈。科爾比本周先後訪問菲律賓、印尼、泰國同柬埔寨，係佢上任以嚟首次出訪東南亞。

有知情人仕透露，科爾比正主持起草新核戰略，強調一旦同中國或俄羅斯爆發地區衝突，可能動用短程戰術核武，並會更新危機期間提交總統嘅核應對選項，以防常規戰爭升級為核戰。報道刊出後，中國官媒同俄方官員先後批評有關構想或加劇緊張。科爾比回應指，相關評估「範圍相對有限」，並非全面嘅《核態勢評估》，美方無意加大對戰區核武嘅關注；佢認為更關鍵嘅係「跨越核門檻」呢個行為本身同其後果，目標始終係維持威懾同穩定，而唔係加劇緊張局勢。

司令部改名方面，戰爭部六月十六日宣布，將沿用八年嘅「印太司令部」改回一九四七年創立時嘅「太平洋司令部」原名，官方解釋係「致敬司令部深厚嘅歷史根源」。科爾比強調，此舉絕非貶低印度或者印度洋嘅重要性，但美軍戰略重點，同新一份《國防戰略》一致，確實在第一島鏈，即由日本經台灣延伸至菲律賓一線，當中西太平洋以至東南亞正係焦點所在。

科爾比過去曾質疑澳英美「奧庫斯」（AUKUS）核潛艇協議，並喺去年主導相關評估；據報評估初稿一度對協議前景有保留，其後經改寫以貼近特朗普「全速推進」嘅立場，有報道更指先後改寫兩次。佢周四改口表示，協議正「全速推進」，五角大樓對進展「非常滿意」，首艘維珍尼亞級核動力攻擊潛艇計劃2032年售予澳洲。不過美國造艦速度一直遲緩，維珍尼亞級年產僅約1.1至1.2艘，單係滿足美軍自身需求已要每年2艘，連同售澳更需達2.33艘。

被問到台灣周五（14日）結束嘅年度漢光演習，科爾比重申美方立場係維持現狀，並刻意有別於上屆政府「言辭激烈但軍力交付不足」嘅做法，以「實力求和平」延續艾森豪威爾（Dwight Eisenhower）、尼克遜（Richard Nixon）以至列根（Ronald Reagan）嘅外交傳統。佢又讚揚菲律賓係「模範盟友」，指《美菲加強防務合作協議》基地建設有進展，並促請南韓、德國、日本、澳洲、波蘭等富裕盟友分擔更多防務責任。佢本周喺馬尼拉一個論壇上亦強調，即使美國正應對伊朗戰事，都唔會撤出亞洲；另據報佢原擬訪華嘅計劃受阻，原因係北京不滿華府去年十二月批准涉及110億美元（約858億港元）嘅對台軍售。