美國北卡羅萊納州，一名駐守布勒堡（Fort Bragg）嘅特種部隊精英，本來係執行國家級秘密任務嘅「尖兵」，點知竟然變咗「金融大鱷」？呢位士官長因為涉嫌利用軍方高度機密，係「預測市場」平台進行內線交易，最終被聯邦調查局（FBI）同檢察機關起訴。今日我哋就嚟睇吓呢單震驚五角大廈嘅「軍事內線案」。

呢位 38 歲嘅被告萬戴格（Gannon Ken Van Dyke），係美國陸軍入面嘅「老差骨」。根據紐約南區檢察官辦公室解密嘅起訴書顯示，佢原本參與緊一項代號為「絕對決心行動」（Operation Absolute Resolve）嘅秘密計劃，目標係要去委內瑞拉逮捕被美方通緝嘅總統馬杜羅。

但係萬戴格並唔止想攞勳章，仲想攞埋「彩金」。檢方指控，佢係舊年 12 月底，係知名嘅預測市場平台 Polymarket 開咗個匿名帳號，然後分 13 次「重注」押注馬杜羅會係今年 1 月底前「落台」。當時外界對呢場突襲行動一無所知，所以呢份注碼被視為「極冷門」，賠率非常高。

最令人驚訝嘅係，根據起訴書，萬戴格最後一次落注嘅時間，竟然係美軍戰機同特種部隊起飛前嘅短短幾個鐘頭。當晚深夜，美軍成功生擒馬杜羅並送往紐約。當全世界仲係度震驚緊嘅時候，萬戴格嘅帳號已經自動「收網」，將原先約 3.2 萬美元嘅本金，瞬間翻咗超過十倍，淨賺 40.4 萬美元。

作為特種兵，萬戴格嘅「反偵查」意識亦都用錯咗地方。調查發現，佢贏錢之後，並冇直接將錢入落銀行，而係先將彩金轉去一個海外嘅加密貨幣「冷銀包」（Cold Wallet），再透過複雜嘅轉賬流程，最後先存入自己嘅個人證券戶口。

不過，Polymarket 平台本身受到執法部門監控。對於呢類「極冷門」且資金龐大嘅精準預測，執法機關早就裝好「雷達」。Polymarket 事後係社交媒體 X 出 貼文話：「當我哋發現有用戶疑似利用政府機密資訊交易，我哋第一時間就移交畀司法部。內線交易係呢度係冇容身之所。」

呢單案甚至驚動咗白宮。總統特朗普係回應事件時，將萬戴格比喻為棒球界傳奇球星彼得羅斯（Pete Rose）——因為羅斯當年身為教練卻投注自己球隊而停賽。特朗普感嘆話：「不幸地，成個世界係某種程度上變咗一座賭場，連呢類國家安全大事都有人攞嚟賭。」

目前，萬戴格面臨包括「非法使用政府機密謀私利」、「竊取政府財產」、「商品欺詐」以及「電匯欺詐」在內嘅五項重罪指控。如果罪名成立，佢唔單止會失去軍籍，仲可能要係牢房入面度過餘生。

呢單案反映出，係預測市場（Prediction Markets）興起嘅年代，傳統嘅軍事保密法規面臨前所未有嘅挑戰。當「機密資訊」可以係虛擬世界直接變現成「加密貨幣」時，軍人嘅職業道德與金錢誘惑之間嘅對抗，恐怕會成為未來國防部最頭痕嘅問題。