台灣總統賴清德原本計劃喺今日（4月22日）出訪台灣喺非洲唯一嘅邦交國史瓦帝尼，行程本來安排到4月26日。不過，就喺出發前夕，塞舌爾、毛里裘斯同馬達加斯加三個國家，突然毫無預警撤銷台灣總統專機嘅飛航許可，結果令到成個出訪行程臨門一腳被迫取消。

今次係台灣歷史上第一次，有總統因為外國壓力，臨時取消出訪邦交國，背後反映出中國大陸對台灣打壓手法已經升級。過去，北京主要係逐個逐個挖走台灣邦交國；但今次就唔止係外交層面，而係進一步去到實際封鎖空域，喺物理層面阻止台灣領導人出境。

根據《聯合新聞網》報道，台灣國安情報顯示，中方今次對上述三個非洲國家施加咗非常具體嘅經濟壓力。核心手段就係威脅取消對呢啲國家嘅大額債務豁免、叫停融資項目，甚至可能進一步祭出經濟制裁。呢種做法係赤裸裸嘅債務勒索。你欠我錢，我而家唔再畀你拖，甚至隨時要你埋單；而你唔聽話嘅代價，就可能係本身已經脆弱嘅經濟再受重創。

再睇返呢三個國家，本身全部都係中國一帶一路倡議之下嘅債務國。根據彭博社報道，台灣方面表示，塞舌爾、毛里裘斯同馬達加斯加原本係已經同意批出飛航許可，但之後喺中方施壓之下突然反口。台灣國安會秘書長吳釗燮之後仲公開咗成件事出現變化嘅時間線，顯示三國態度喺極短時間內急速逆轉，情況明顯唔尋常。

如果從國際法同國際慣例角度睇，今次事件嘅嚴重性其實唔可以低估。領空管理固然係一國主權範圍之內，但一般都應該根據國際民航規則，以安全、穩定、可預測為基本原則，而唔應該攞嚟做政治工具。歐盟發言人今次都罕有開腔，明確講到領空管理相關決定應該透明、可預測，唔應該變成達成政治目的嘅手段。對台灣議題而言，歐盟會咁樣公開講，已經算係相當少見。

美國方面亦都有反應。《聯合新聞網》引述，美國眾議院外交委員會公開表態撐台，仲轉發咗賴清德相關帖文，批評中共霸凌親密夥伴台灣。而《華盛頓時報》亦有詳細報道今次事件，將之定性為中國向非洲國家施壓、迫使對方改變立場嘅典型操作。

但如果只係停留喺表面譴責，其實未夠。真正要問嘅係，中共點解偏偏要揀呢個時間點，用咁強硬、咁直接嘅方式出手？

第一，呢個係一個地緣政治窗口期。現時全球焦點集中喺美伊衝突，國際社會對其他地區問題注意力下降，北京喺呢個時候郁手，相對上面對嘅外交反彈會細好多。即係話，當全世界都望住中東，台灣喺非洲出訪受阻，國際聲量自然細，成本亦都低。

第二，呢件事同賴清德上任之後嘅兩岸氣氛持續緊張有直接關係。賴清德無論喺競選期間定上任之後，都多次強調台灣主體性，呢啲講法一直都係北京最敏感、最忌諱嘅地方。而史瓦帝尼又係台灣喺非洲僅存唯一邦交國，如果今次出訪成功，對賴清德嚟講，無疑會被視為一個外交成果。北京喺起飛前夕出手攔截，唔單止係要阻止今次訪問，更加係要向全世界示範一件事：中國有能力喺全球任何地方，進一步壓縮台灣外交空間。

第三，今次事件亦都將所謂債務陷阱外交，由抽象討論變成實際操作案例。以往國際社會講中國一帶一路，成日都討論中國會唔會利用債務做政治槓桿，但好多時都停留喺學術層面，甚至有人話呢個講法過分誇大。但今次事件就畀咗一個相當具體嘅示範——中國的確可以透過債務關係，迫使一啲主權國家喺短時間內推翻原本已經答應咗嘅外交安排。三個國家一齊喺最後關頭反口，仲要咁一致，背後如果冇外部巨大壓力，幾乎講唔通。

賴清德表示，中國嘅壓制行動，正正證明威權國家對國際秩序、和平同穩定構成威脅，並強調任何威脅或者打壓，都改變唔到台灣接觸世界嘅決心。目前台灣剩返12個邦交國，而今次事件顯示，即使係同邦交國之間本來正常不過嘅互訪安排，都未必可以順利成行。北京而家唔再滿足於挖走台灣邦交國，而係連台灣同現有邦交國保持聯繫，都要盡量阻撓，令台灣國際活動空間一步一步收窄。

今次事件揭示嘅，就係同一套經濟綁架政治嘅操作模式。以前可能仲會用投資、援助、合作包裝一下，依家就愈來愈直接，唔再係請客食飯、做公關，而係掐住你經濟命脈，逼你照佢意思做。某程度上，呢件事標誌住中國喺對外外交博弈上，已經由以往較多依賴所謂軟實力，轉向更加赤裸、更加具威嚇性嘅硬實力操作。

有學者分析認為，今次去唔成，將來只會更難。因為北京既然已經示範到，連第三國空域都可以用嚟作為打壓台灣工具，未來台灣總統、官員甚至其他官方訪問團，要出訪邦交國或者過境第三地，都有可能面對更大阻力。而國際社會除咗口頭譴責之外，能夠提供幾多實質支援，其實非常有限。北京對台封鎖戰再升級，由拔邦交國、封活動，到而家連飛機路線都要掐住，台灣面對嘅已經唔止係外交打壓，而係一種愈來愈接近全面窒息式嘅國際封鎖壓力。