醫務委員會昨日（16日）就前立法會議員、泌尿外科專科醫生郭家麒涉及民主派初選案展開紀律研訊，裁決將佢從醫生註冊中無限期除名，並喺刊憲之後即時生效，係本港第一宗註冊醫生涉及《港區國安法》案件而觸發嘅紀律研訊。

郭家麒因為參與2020年7月民主派非官方初選，喺2024年8月27日被高等法院裁定「串謀顛覆國家政權」罪成，違反《港區國安法》第22(3)條，被判監50個月。醫委會之後喺4月16日對佢展開紀律研訊，最終由研訊小組裁定，將佢永久踢出醫生註冊名冊。

研訊小組喺控詞入面表明，完全接納高等法院對郭家麒嘅判刑理由，認定佢喺民主派初選案之中屬於「積極參加者」。小組認為，為咗維護公眾對醫學界嘅信心，對郭家麒嘅懲處必須反映社會價值觀，又指佢「公然違反《國安法》已損害專業聲譽」。小組進一步認為，郭家麒提交嘅回覆顯示，佢「缺乏悔意且無反省，對罪行嚴重性缺乏認識」，因此有必要將佢除名，以保障公眾利益。

「維護公眾信心」係香港醫療專業紀律制度入面一個既有概念，通常係針對醫療質素、專業操守、誠信問題、病人安全等範疇。例如醫生如果病歷處理不當、洩露病人私隱、欺詐、或者喺診治過程中有嚴重失當，呢啲都會被視為損害公眾信心。但今次郭家麒案件，明顯唔同。因為佢被定罪，並唔係因為行醫失當，而係因為政治案件。

醫委會法律顧問喺研訊期間，引用咗多個案例，包括許金山殺妻女案，同獸醫Mark Herbert Benjamin性騷擾案，強調即使定罪本身同醫療行為無直接關係，只要有關行為損害專業聲譽，或者構成專業失德，都可以判處永久除牌。

郭家麒無親身出席研訊，亦無派法律代表到場。喺早前提交嘅陳述書入面，郭家麒質疑，佢被定罪純粹涉及政治承諾，同臨床實踐、專業誠信或者疏忽完全無關，而且佢喺案件中參與程度有限，唔應該被視作嚴重罪行。佢仲曾經向秘書處形容，面對擁有龐大資源嘅當局，自己猶如「面對高牆嘅雞蛋」，形容準備研訊係一場艱苦戰鬥。

喺傳統法治框架之下，刑事定罪通常決定嘅，係刑期、自由、甚至部分政治權利，例如參選權、投票權等；但專業資格理應有自己獨立判準。而家，呢道防火牆顯然已經被打穿。

今次裁決會唔會形成示範效應？香港好多專業監管機構——律師會、會計師公會、建築師學會、工程師學會、社工註冊局等等。如果醫委會今次接納政治定罪作為紀律基礎，其他專業機構日後會唔會照辦？一個被判國安罪嘅律師，係咪都應該被除名？一個會計師、社工、教師，係咪都會面對同樣命運？

郭家麒喺裁決公布之後，喺社交平台發文表示，佢喺香港行醫超過40年，對於今日被褫奪執業資格，自己「毫不詫異」。佢直言，當教師、社工同律師等專業人士相繼失去資格，自己被除牌都屬意料中事。佢再次強調，今次事件並唔係因為專業過失，而係源於參與2020年立法會初選。

郭家麒喺帖文入面亦回顧自己背景，指自己1985年畢業於香港大學醫學院，擁有英國皇家愛丁堡外科醫學院同香港醫學專科學院等多項院士資格。佢強調，過去40年運用專業知識醫治病人，以及喺議會中以醫生身份爭取改善醫療服務同制度，呢啲事實唔可能被抹走。

佢又話，喺今時今日，大家都明白，幾荒謬嘅事情都可以發生，所以自己都見怪不怪。雖然無法再喺香港行醫，但佢提到，自己喺獄中四年期間，仍然刻苦進修，以維持專科資格；未來即使要「轉跑道」，都會繼續以幫助有需要嘅人作為己任，並勉勵公眾喺悲哀同沮喪之中，仍然要好好生活。

當「維護公眾信心」開始被重新詮釋為包含政治合規性，專業監管機構實際上就唔再只係維持專業標準，而係開始扮演政策執行者角色。政府甚至唔需要額外立法，亦唔需要公開政治辯論，只要透過一啲聽落中性、實際操作空間好大嘅概念，例如「公眾信心」、「專業聲譽」、「社會價值觀」，就已經可以將政治要求滲入專業領域。