4月16日俄羅斯對烏克蘭發動咗今年以嚟規模最大空襲。根據烏克蘭空軍公布，過去24小時之內，俄軍一共出動咗659架Shahed自殺式無人機，同埋44枚巡航同彈道導彈，進行多波次密集攻擊。烏克蘭防空系統成功攔截或者干擾咗當中636架無人機同31枚導彈，整體防禦成功率大約94%。

死傷情況相當嚴重。今次空襲至少造成16至18人死亡，超過100人受傷。首都基輔有4人死亡，其中包括一名12歲女童。南部港口城市敖德薩有9死23傷，第聶伯地區3死34傷，札波羅熱亦有1人死亡。

基礎設施方面，同樣受到嚴重打擊。一艘掛瑙魯旗嘅貨輪喺敖德薩港中彈，港口設施大面積受損。基輔市內波迪爾斯基、奧博隆斯基同德斯納區，多棟建築倒塌，引發火災，大量民用設施被破壞。

4月13日至14日，東正教復活節期間，俄烏雙方曾經短暫停火32小時，期間仲進行咗175人嘅戰俘交換，由阿聯酋居中斡旋。停火喺14日午夜結束，而只係隔咗一日，俄軍就喺16日凌晨發動今年最猛烈嘅空襲。

俄羅斯國防部解釋，今次行動係為咗報復烏克蘭之前對俄境內煉油廠同軍工設施嘅無人機攻擊。顯示出，普京政權似乎無再打算透過談判去解決衝突，停火只係戰術上嘅喘息，而唔係任何談判誠意嘅表現。

特朗普政府近期將焦點轉向中東。美國同伊朗喺4月8日達成一個為期兩星期嘅停火安排，談判重點集中喺核問題、海峽控制權，同埋黎巴嫩相關議題。副總統萬斯甚至親自參與伊斯蘭堡談判，反映華盛頓對中東局勢嘅優先程度已經上升。對俄羅斯嚟講，美國對烏克蘭嘅關注正在下降，正正為俄方提供咗擴大軍事行動嘅空間。

另一邊，烏克蘭總統澤連斯基正喺羅馬進行外交訪問。佢此行主要目的，向歐洲國家求援。據報佢已向德國、挪威同意大利提出要求，希望增加「愛國者」防空導彈系統供應。不過外界擔憂，一旦美國抽離主導角色，歐洲國家之間嘅協調能力有限，多邊支援體系好容易出現鬆動。