根據台灣《中央社》4號報導，中國農曆春節假期結束，電影票房創春節檔歷史新高，成為官媒日日「報喜」嘅重點訊息，其中在多地發放嘅電影代金券，被認為係整體票房嘅關鍵。不過外媒認為，經濟不振致消費降級，睇電影成春節期間較旅遊更廉價嘅替代方案，非推升票房嘅原因。

綜合中媒報導，截至4號上晝10點，中國春節檔總觀影量突破1.7億人次，刷新中國影史春節檔觀影紀錄。截至今日上晝10點35分，今年春節檔電影票房已突破人民幣87億元，同創春節檔票房歷史新高。

中國今年嘅農曆春節假期長達8日。《路透社》早前報導指，中國電影票房收入創歷史新高，原因之一就係在經濟成長相對緩慢嘅時期，其他類型嘅支出受影響，使春節嘅熱門電影吸引咗大批觀眾前往觀影。

報導指，造成春節高票房嘅另一原因，係中國政府將「觀影」視為經濟刺激計劃一部分，從而提供補貼，凸顯官方如何透過補貼，刺激消費者消費。其中，「北京、江蘇、湖北、廣東」等省級政府，紛紛發放消費券性質「電影代金券」，作為未來一年推動經濟保持5%成長嘅一部分。

報導另提到，春節期間，中國小縣城嘅電影院座無虛席，票價不只更貴，且電影票往往銷售一空。而中媒更曾報導指，湖南有間電影院，春節期間為滿足大量觀眾需求，甚至出售站票。

報導又指，中國消費者由於就業、收入轉趨不穩，以及樓市長期低迷拖累，紛紛縮減支出。部分年輕人「唔理」官方大力呼籲消費，反加倍儲蓄，甚至互相交流點樣儲蓄「少使錢多儲蓄」。《自由亞洲電台》日前報導指，有網友表示在電影院內「搵到春運感覺」。