中國國家主席習近平美東時間周三（23日）傍晚、即香港時間24日清晨抵達華盛頓，展開為期三日嘅國事訪問，亦係佢11年來首次國事訪美。美國總統特朗普破格親身到安德魯斯聯合基地接機。幾乎同一時間，美國財長貝森特接受霍士新聞訪問時宣布，中美同意將原定11月10日屆滿、美方稱為「釜山協議」嘅貿易休戰延長兩個月，至明年1月10日。

貝森特表示，延期係佢當日同中國國務院副總理何立峰喺世界銀行總部會談約90分鐘後敲定。雙方周日聯同美國貿易代表格里爾喺紐約會談咗大約12個鐘，中方當時提出達成「更大協議」嘅構想。貝森特指，今年兩國元首或最多會面四次，除咗5月北京同今次華盛頓，仲有11月深圳APEC峰會同12月邁阿密G20峰會，所以美方對延續釜山安排或研究更大協議都持開放態度，但亦坦言唔知最終傾唔傾得成。

休戰只延兩個月，反映華府對北京仍有保留。貝森特指中方部分承諾執行得「唔完美」，要睇未來幾個月中方能否落實得更全面。佢舉例指，中方有履行每年採購2,500萬噸美國大豆嘅承諾，但採購約170億美元（約1,326億港元）其他農產品嘅承諾就進度落後。稀土係另一個痛點，美國官員上周形容中方稀土交付「未達標」。格里爾周一接受彭博電視訪問時已表明，美方傾向以三至六個月為單位逐步延期，測試中方有冇遵守承諾，直言而家話雙方完全互信「有啲天真」。據報北京原本希望延至特朗普任期完結，結果連格里爾講嘅下限都唔夠。

去年中美一度互加三位數關稅，其後經多輪談判降溫；同年10月特朗普與習近平喺南韓釜山會面，達成為期一年嘅休戰：中方恢復稀土磁體及其他關鍵礦產供應，並暫停10月9日公布嘅稀土出口管制新措施；美方則下調部分關稅，並暫停出口管制「50%穿透性規則」，以及對中國相關船隻徵收港口費等措施。今次延期，意味住呢批原定11月到期嘅暫停安排可以多撐兩個月。

至於周四嘅白宮峰會，貝森特透露雙方可能宣布為各自300億美元（約2,340億港元）非關鍵商品減免關稅，以及金融服務、農產品採購等安排。格里爾早前指，中方出口清單料以消費品同低技術產品為主，美方就包括能源、農產品，以至醫療器械。

人工智能係另一焦點。貝森特稱雙方同意設立熱線，互相通報人工智能安全事故，但中方未有確認，新華社只提及雙方討論過人工智能。特朗普周二喺聯合國大會就強調，美國喺人工智能領域「大幅領先中國」，唔會壓抑行業發展。分析普遍認為，雙方喺人工智能、稀土以至台灣、伊朗等敏感議題上都難有重大突破。

習近平抵美後發表書面講話，表示中美應該係夥伴而唔係對手。今次峰會正值特朗普希望結束伊朗戰爭、支持率下滑，而11月中期選舉又迫在眉睫。按白宮安排，兩國元首周四舉行歡迎儀式及閉門會談，晚上設國宴，英偉達行政總裁黃仁勳同馬斯克等科技界人物都會出席。有市場分析指，延期兩個月只係將關稅風險推遲到明年初。