繼內地網約車平台「高德打車」舊年進軍香港之後，「滴滴出行」上個月都登陸咗本港，令本地的士業界對白牌車問題越嚟越擔心。智慧出行聯合商會主席周國強今朝（11號）聯同多位業界代表去咗西九龍政府合署請願，要求政府加快立法規管網約車，堵塞現時法例漏洞，打擊非法白牌車營運。

周國強話，業界而家面對好大衝擊，估計已有成15萬名乘客畀白牌車攬走，導致整體收入跌咗兩成，仲有成75%車主陷入資產負債狀況，情況非常嚴峻。他又批評，有啲司機仲喺機場設立白牌車據點，喺法律灰色地帶運作，嚴重打擊正當經營嘅車主。

佢話明白有市民覺得網約車係未來趨勢，但強調唔同地方法例唔同，香港唔應該盲目跟風，佢直言：「唔係國家有網約車，香港就一定要有網約車。」佢又舉例話內地容許賣電子煙，但香港就準備全面禁止，兩者情況差唔多。佢呼籲車主簽授權書，由商會代表去特首辦反映業界聲音。

周又提到，雖然政府舊年推出的士司機違例記分制度，令投訴數量有下降，證明業界有改善服務，但白牌車問題如果再唔處理，合法的士業好難繼續生存。佢語氣激動咁講：「當政府唔去重視將非法嘢拎走，合法嘢冇權益，根本唔使罷駛啦，全部都唔使駛啦，啲人點做啫？不如個個都去做非法嗰啲啦！」

的士車行車主協會永遠榮譽會長兼主席、有「的士大王」之稱嘅鄭克和亦有發聲，批評政府多年嚟都冇就白牌車問題立法，令業界完全失去信心。佢嬲爆講：「高德、滴滴出嚟果陣，話係做『網約的士』，話受業界歡迎，結果就搵啲白牌私家車加入，咁對得住邊個？」佢重申如果政府繼續唔理，唔排除會採取法律行動，甚至唔排除罷駛抗議，捍衛合法車主嘅生計。

智慧出行聯合商會當日仲提出三大訴求，包括：一，立即修訂法例堵塞法律漏洞；二，加強執法，針對平台同營運者；三，保障的士業界權益，維持交通秩序同可持續發展。