荷蘭情報機構今日表示，一個背後有中國支持嘅網絡間諜，喺去年成功入侵咗荷蘭軍事網絡，機構表示呢個係中國對荷蘭及其盟友進行政治間諜活動嘅一部分。

荷蘭首次公開將呢種網絡刺探活動歸咎於中國所為，反映咗兩國之間嘅國家安全緊張關係升級。

荷蘭國防部長奧隆格倫（Kajsa Ollongren）表示：「重要的是，要讓公眾知悉中國從事這類間諜活動，因為這有助於提升國際對這類網路刺探活動的抵禦能力。」

荷蘭軍事情報同埋安全局（MIVD）同埋荷蘭情報同埋安全總局（AIVD）表示，中國支持嘅黑客入侵咗荷蘭武裝部隊網絡，成功喺入面安裝咗惡意軟件，掩蓋自己嘅活動，而呢個網絡有50人係做非機密研究嘅

呢兩個機構係報告中強調，呢個並唔係單一事件，而係中國對荷蘭及其盟友進行更廣泛嘅政治間諜活動趨勢嘅一部分。

喺去年4月，荷蘭情報同安全總局嘅年度評估報告中指出，中國對荷蘭嘅經濟安全構成最大威脅，指中方試圖對高科技公司同大學，進行間諜活動。

另一邊廂，菲律賓嘅資訊同埋通訊科技部喺尋日（6日）表示，上個月有黑客企圖入侵菲律賓總統小馬可斯嘅電郵、個人網站、資訊部嘅電郵系統，以及全國海岸監視中心嘅網站，但全部未能成功。追查黑客使用嘅IP地址之後，發現佢哋係嚟自中國，而且使用咗國企中國聯通嘅服務。

資訊部稱，唔能夠確認政府同黑客攻擊事件之間嘅關聯，強調菲律賓唔想將事件歸咎係任何特定嘅國家，而且已經要求中國政府協助，以防止進一步嘅攻擊。菲律賓海岸防衛隊發言人接受當地媒體訪問時承認，佢哋嘅網站遭到黑客攻擊，唔排除呢件事同菲律賓同中國喺南海主權爭議上嘅關係。

中國駐荷蘭、駐菲律賓大使館發言人都有分別回應事件，但內容都接近「複製貼上」，指中國政府一貫堅決反對並依法打擊各種形式嘅網絡攻擊，不允許任何國家或個人在中國境內或利用中國基礎設施從事網絡攻擊等非法活動。又指中方反對任何惡意揣測和無端指責，主張通過對話合作，共同維護網絡安全。

另外駐菲大使館發言人更指，菲方個別官員同傳媒喺沒有事實依據嘅情況，將事件與中菲海上爭議掛鈎，呢種言行係極不負責任。