英國《金融時報》報道，即將落成嘅長江中心二期出租率僅10%，戴德梁行預測，未來五年將有約670萬平方呎嘅新寫字樓投入市場。報道引述高力國際主管顏慧萍指，許多跨國公司在港正縮減規模，因此香港頂級寫字樓租賃市場尚未見底。

《金融時報》今（8日）發表長篇專題「香港房地產慘痛低迷」（The painful slump in Hong Kong property），分析香港地產市場現況，報道引述三位地產代理指，The Henderson目前出租率僅60%，租戶包括拍賣行佳士得、瑞士鐘錶製造商愛彼（Audemars Piguet）同私募股權公司凱雷（Carlyle）。

翻查資料，舊年9月恒地披露當時The Henderson出租率係接近50%，又希望今年出租率可以升至80%，惟現時出租率仍未達預期。恒地證實出租率目前係60%，表示該項目將進一步增加集團嘅經常性收入。

相比已經完工、今年第二季起租戶陸續進駐嘅The Henderson，一街之隔興建中嘅長江中心二期出租率更低。《金融時報》引述地產代理指，因為同潛在租戶嘅談判一拖再拖，今年3月項目出租率僅得10%，而發展商長實未作回應。

報道引用戴德梁行預測，未來五年將有約670萬平方呎新寫字樓投入市場，係The Henderson總樓面面積嘅14倍。

高力國際企業客戶服務主管顏慧萍指出，香港頂級寫字樓租賃市場尚未見底，「許多跨國公司正在縮減規模，受到疲弱經濟嘅影響……而內地公司由於預算限制，未像之前預期咁快速進駐」。

瑞銀數據顯示，香港中環商業區嘅辦公室租金仍然比新加坡濱海灣（Marina Bay）高約35%，又預計香港今年住宅樓價再下降5%。瑞銀投資研究董事梁展嘉預測，住宅價格同辦公室租金都將好難像過去咁反彈。

《金融時報》訪問科大客座教授羅寶文，佢同時係地產商鷹君集團創辦人羅鷹石嘅孫女。她唔認為港府希望樓價回到以前嘅水平，又指樓價再度飆升對社會唔健康。她希望樓價回落到對每個人嚟講最舒服嘅水平，而最大嘅商界領袖又唔至於抱怨。

不過，報道形容香港四大地產商嘅董事會，長實、新鴻基、新世界同恒地對於市場嘅修正愈嚟愈感到不安。在樓價下跌前，部分地產商大舉投資買地，例如恒地喺2021年以508億元投得中環一塊海濱地；新鴻基喺2018年以251.6億元投得啟德一幅地皮。

摩根士丹利嘅分析師估計，按照目前嘅價格，發展商嘅經營利潤率可能從2022年約40%頂峰下降到2025年嘅19%。法國外貿銀行亞太區高級經濟學家吳卓殷認為，地產項目收支平衡點會較預期遲達到。

《金融時報》引述分析師指，地產商唔太確定點樣去預測未來十年嘅市況。隨著香港經濟同中國內地更加融合，未來嘅發展更多偏向喺新界外圍、靠近中國邊界嘅地區。但係，北部都會區同人工島計劃令人懷疑，香港長期需求係咪能夠消化呢啲額外嘅供應。《I》