台媒《自由時報》日前以標題「意外？暗殺？中國頂尖科技人才接連離奇死亡引猜測」報道，指近排1、2年嚟，中國有好多頂尖科技人才離奇死亡，包括人面辨識專家、被譽為中國AI一哥嘅商湯科技創辦人湯曉鷗；解放軍AI同國防科技「天才科學家」、「軍用AI第一把交椅」的學者馮暘赫，仲有中國出名嘅高分子材料領域專家、中國科學院研究員周光遠等；最新一單係貴州大數據安全工程研究中心創始人劉東昊，啱啱「意外」離世，引起唔少陰謀論憶測。

近年嚟，中國損失咗好多頂尖科技人才，單單人面辨識領域就有2位去世，中國AI獨角獸「曠視科技」首席科學、曠視研究院院長孫劍喺2022年離世，年僅46歲。曠視喺2022年6月14日發訃告話，孫劍因病治療無效而離世。根據曠視內部嘅人透露，13日晚上孫劍仲好正常，跑完步返屋企就突然倒下，緊緊送醫後不治身亡。

另一位中國AI界大佬-商湯科技創辦人湯曉鷗，就喺2023年12月15號傳出離世嘅消息，享年55歲。有內地傳媒稱，湯曉鷗係跳樓身亡。但商湯科技就發訃告澄清，指湯曉鷗係因病治療無效而離世。

中國全國架設嘅「天網」監控工程，商湯科技就係幕後推手，令當局可以利用該公司技術，遠距離辨識大量人面。此舉引發人權專家批評，商湯開發嘅監視軟件有損人權，有違AI發展嘅倫理規範，根本唔應該存在。

早喺2021年12月10號，美國就以協助中國政府迫害新疆維吾爾族等穆斯林少數民族人權為由，將商湯科技列入禁止美國投資嘅中國軍工複合體企業黑名單。商湯被列美國黑名單後，同年12月14號曠視科技等多間中企都被列入。

美國財政部強調，呢啲中資企業係支持中國政府對少數民族嘅生物特徵識別同追蹤，美國財政部要確保美國嘅投資人唔會支持呢啲行動。

而中國軍用AI第一人馮暘赫就喺車禍中離世。解放軍入面精通AI同國防科技嘅馮暘赫死因更加離奇。根據中國人工智能學會喺2023年7月11號喺官方微信公眾號發布訃告，話馮暘赫喺7月1號中國共產黨黨慶時嘅凌晨2時35分，喺北京出咗意外，享年38歲。

據中國官方報道，馮暘赫喺北京出席一場重要會議後，乘坐嘅軍方專用小轎車同另一架水泥大卡車相撞，馮暘赫當場去世。當時好多中國網友都質疑，馮暘赫可能係遭到暗殺，唔係意外死亡。

據報道，中國出名嘅高分子材料領域專家、中國科學院研究員周光遠都係舊年末離世。中科院大連化學物理研究所發布訃聞，周光遠喺2023年12月16號上午喺吉林長春不幸去世，網傳佢可能係車禍死亡。

周光遠生前主要研究生物基聚酷、特種工程塑料嘅合成同應用技術，曾經擔任過中國科技部863新材料領域專家、重點研發計畫材料領域專家等職務。

消息話，貴州大數據安全工程研究中心創辦人劉東昊亦喺最近離世。微信公眾號大數據安全工程研究中心9號公布，貴州大數據安全工程研究中心創辦人、理事會秘書長，大數據安全工程研究中心（貴州）有限公司總經理劉東昊，因意外喺2024年3月5號離世。至於劉東昊幾多歲，而家並唔清楚。

據中國官網介紹，貴州大數據安全工程研究中心係由貴陽市人民政府同阿里巴巴集團共同成立，2017年11月開始運作，專注研究同發展資料安全，探索資料安全嘅治理模式同產業實踐，打造中國國內領先嘅資料安全機構。

對於一連串離奇死亡事件，有網民認為係：「鳥盡弓藏，兔死狗烹」、「擺明知太多野老頂有d擔心，只有死屍先忠誠」、「叻過習近平既下場」、「只有屍體先會守得住秘密」，亦有人懷疑：「好似李克強?」等。《I》