來自英國嘅香港終審法院非常任法官岑耀信勳爵（Lord Sumption）同郝廉思勳爵（Lord Collins）宣佈辭任。郝廉思指，佢辭任係因為香港嘅政治狀況。岑耀信就話，會喺適當時候作出回應。香港監察表示，歡迎兩位法官嘅決定，又指仲有七名外籍法官需要離開。

綜合美國之音、中央社、大紀元等媒體報道。呢項消息首先由英國著名法律評論家Joshua Rozenberg發出，郝廉思喺回覆Rozenberg時指，佢辭任香港終審法院係因為香港嘅政治狀況，但又話繼續對香港終審法院同法官嘅獨立性有充分信心。岑耀信回覆《南華早報》時表示，下周將發表辭職聲明。

司法機構昨（6日）晚透過政府新聞處發稿，指二人已分別向特首提出請辭。終審法院首席法官張舉能喺今（7日）凌晨0時56分發聲明，指對二人辭任表示遺憾，但讚揚二人在內嘅海外非常任法官對終審法院嘅工作貢獻良多，「香港司法機構對此表示謝意」。

張舉能話，香港將繼續任命其他普通法適用地區嘅合適人選出任非常任法官。聲明最後更加上一句「終審法院首席法官代表其本人及終審法院常任法官作出以上聲明。」

新聞處喺7日凌晨1時32分發稿，稱特首李家超對二人辭任表示遺憾。對於郝廉思提及香港嘅政治情況而辭任，李家超就話，喺《國安法》及《基本法》23條立法後，「香港已由亂到治」。

83歲嘅郝廉思同75歲嘅岑耀信都係前英國最高法院法官；兩年前，亦有兩位英國法官辭任香港終院非常任法官。

美國喬治城大學（Georgetown University）亞洲法中心香港法學者黎恩灝分析，雖然郝廉思冇明言，只話係因為政治理由，但睇睇呢幾個月發生嘅政治事件，最關鍵嘅就係政府通過23條嘅立法，呢個法例係廣泛被視為侵害香港嘅人權同自由。

喺2022年3月，英國最高法院正副院長韋彥德勳爵（Lord Reed）同賀知義勳爵（Lord Hodge），宣佈因為香港政治同法律環境嘅轉變，即時辭去香港終審法院非常任法官職務。

黎恩灝表示，當時其他擔任香港非常任法官、但喺英國已經退休嘅法官發聲明表明會留任，但兩年後佢哋就改變決定，相信一定同香港嘅變化有關。

英國人權組織「香港監察」（Hong Kong Watch）研究同政策顧問Megan Khoo表示，「我哋好高興見到，喺爭取外國法官辭任香港終審法院之後，岑耀信同郝廉思終於醒悟過來，並決定喺香港日益嚴厲嘅國家安全框架下，佢哋已經睇夠了。依家，仲有七名外籍法官需要離開。」

佢指，香港監察剛發表一份關於23條通過後所帶嚟嘅法律同商業風險嘅報告，海外法官應該要知道香港嘅商業同法律環境已經與往常不同。《I》