台灣「護國神山」晶片製造商台積電喺星期二（四日）表示，公司已經同輝達、蘋果等主要客戶傾過，討論喺兩岸關係惡化嘅時候，應唔應該將工廠搬離台灣。不過，傾完結果係，搬廠幾乎冇可能。

台灣新總統賴清德上個月正式就職之後，解放軍喺台灣周邊舉行大規模軍事演習，兩岸之間嘅緊張關係突然升溫，北京嚴厲譴責賴清德嘅就職演說係鼓動台灣獨立。

台積電新任董事長魏哲家喺公司年會結束之後同媒體講，台海局勢不穩定確實係供應鏈嘅一個考慮因素。台積電同客戶傾過，如果台海發生衝突，台積電嘅生產能唔能夠搬去美國亞利桑那州等海外工廠。不過，魏哲家話，台灣嘅產能目前佔台積電總產能嘅八九成，要將其產品生產完全移出台灣係唔可能嘅。

魏哲家表示，希望戰事唔好發生，如果發生，唔只半導體產業要擔憂，仲有更多嘢要擔憂。他認為，兩岸及世界領導人都係聰明同有智慧嘅人，唔會令戰爭發生。

魏哲家指出，台積電最先進嘅製程一定要喺台灣開始，美國雖然規劃生產兩奈米製程，不過台灣明年就會開始生產兩奈米，一定要喺台灣站穩腳步，之後先到其他地方。

魏哲家話，台積電未來嘅投資，第一優先係台灣，第二優先都係台灣，第三優先仲係台灣。雖然美國規劃兩奈米製程，但所有最先進嘅製程一定都會由台灣開始。

路透社嘅報道話，雖然兩岸關係緊張，但本週喺台北舉行嘅每年一度嘅台北國際電腦展（Computex）上，除咗記者之外，戰爭或戰爭威脅晶片供應鏈嘅話題幾乎冇引起關注。

台灣力積電董事長黃崇仁對媒體表示，「沒人擔心這個問題（戰爭）」，「我認為當然總會有軍事活動或攤牌，但台灣對人工智能來說是如此重要，即使是中國人也知道這一點。」

而外資確實亦持續投資台灣。鴻海集團董事長劉揚偉星期二宣布，佢同輝達行政總裁黃仁勳喺台北國際電腦展上會面，就雙方攜手喺高雄建設先進雲算力中心達成共識。

劉揚偉話，高雄軟件園區以超級晶片GB200伺服器為核心嘅先進算力中心，總計共64櫃、4608顆CPU（中央處理器），預計2026年完工。

黃仁勳讚揚鴻海係輝達嘅優秀供應商，亦係智能製造、機械人生成式AI應用嘅開拓者。黃仁勳仲話，輝達未來幾年將繼續喺台灣投資，計劃建設嘅研發中心將僱傭1000名工程師，涵蓋晶片、軟件、系統、人工智能等多個領域。《I》