全歐收網! 香港貿發局前員工做中國間諜在德國被捕 港府火速切割:係佢個人行為
全歐收網! 香港貿發局前員工做中國間諜在德國被捕 港府火速切割:係佢個人行為

近期接連有港府駐外機構員工涉間諜行為被捕,《南華早報》日前報道,一名德國籍香港貿易發展局前員工涉嫌為中國做情報工作,上月被德國當局拘捕。貿發局昨(14日)回覆查詢火速切割稱,只係一名前僱員因「個人活動」接受其國家相關部門調查,強調貿發局並非受查對象。

 

德國上月拘捕3名國民,指佢哋涉嫌為中國蒐集可用作軍事用途嘅科技資料,以及偷運一個特別雷射器到中國。德國當局未有披露3人全名,僅以 Thomas R、Ina F.同Herwig F.表示。不過據德國媒體稱,呢三人經營嘅組織英文翻釋為「Smart City Association」。

 

從組織網站可見,聯絡人為湯馬斯(Thomas Reichenbach)係協會主席,簡介提及佢具有戰略管理顧問背景,專門從事德國同中國電動車技術轉移專案。伊娜(Ina Fischer)則係副主席,簡介指佢有管理國際人才智庫。至於赫維格(Herwig Fischer)則係財務總監。協會嘅目標係通過「創新概念」尋求更有效率嘅交通解決方案。

 

而據《南華早報》報道,湯馬斯(Thomas Reichenbach),曾任貿發局市場經理,佢被指受聘於中國國安部。另外兩名疑犯則係夫婦,利用自己喺杜爾塞多夫(Dusseldorf)管理嘅一間公司,幫中國獲取資訊同設備。

 

德國檢察官指,兩夫婦喺湯馬斯嘅指示下,同德國一間大學簽署一份合作協議,委託該校研究可用於生產軍用艦船大功率發動機嘅機械零件。

 

德國聯邦檢察院稱,疑犯被捕時,正就可能有助擴大中國海軍戰鬥力嘅研究項目進行談判,亦涉嫌喺未獲得必要授權嘅情況下,購買一種特殊雷射光設備並運往中國,資金更係由中國國安部提供。

 

貿發局回覆查詢時未確認有前員工因國安罪行被捕,僅表示一名前僱員因個人活動接受其所屬國家相關部門調查。貿發局稱由於事件仍調查中,不宜進一步評論。

 

而喺英國,當地警方昨(13日)表示,已控告三名涉嫌協助香港情報機構嘅男子,呢三名男子被指控違反咗2023年嘅《國家安全法》,涉嫌協助外國情報機構同埋涉嫌犯下外國干涉罪。英國警方表示:「上述指控涉及嘅外國情報機構指嘅係香港情報機構。」

 

對於近來發生多單港府駐外機構員工涉侵害他國國家安全,被外國當局拘捕嘅事件。有網民認為:「明顯西方要收網了,最後美國出手冚你旗,香港即時升格做国制金溶中心,從此同國際無緣」、「全歐收網,分分鐘陸續有嚟」。《I》

發佈時間: 2024年05月14日 13:17
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.