今（15日）舉行嘅第十屆全民國家安全教育日開幕典禮暨主題講座上，中央港澳辦、國務院港澳辦主任夏寶龍透過視像發言，全程火力全開，指 「反中亂港分子未被徹底清除」仲潛伏喺社會之中，又警告本港工商界若向美國跪低、背叛祖國，「永遠不會有好下場」。

夏寶龍開場就話，而家美國打壓香港係變本加厲，毫無底線。佢點名指，最近美國推出嘅《2025年香港政策法報告》，又對6名中央駐港機構同特區政府官員實施制裁，形容美國又霸道又霸凌，竟然對從來冇設關稅嘅香港累計加徵145%關稅，痛斥「他不是要我們的稅，而是要我們的命」，用詞極為激烈。

夏寶龍話，中國人民由苦難中走出嚟，任何人想令中國人再次陷入貧弱、任人宰割嘅境地，根本係癡心妄想。佢話，外部勢力想搞亂香港，將香港推翻返去動盪不安嘅年代；想令人民失去生活保障、發展希望；想阻撓中華民族偉大復興，全都係白日夢。佢又話，美國對香港一而再、再而三施壓，最後只會加快佢哋喺香港嘅代理人滅亡，最終亦會反噬返美國自己，佢話：「要讓美國那些『鄉巴佬們』在中華民族5000年文明面前去哀鳴。」

夏寶龍恐嚇稱，香港社會而家睇落平靜，但其實「暗流湧動」，安全形勢依然嚴峻複雜。佢聲稱，反中亂港分子未被徹底清除，有啲潛逃海外繼續搞事，有啲就偽裝成普通市民潛伏喺社會之中，等待機會再搞亂香港。又點名批鬥稱，社會上仍有唔少人思想模糊，有人同情反中亂港分子，有人為佢哋開脫，仲有啲人媚美、恐美、崇美、幻想美國，錯誤以為只要搞好經濟就等於安全，形容呢啲人係「掩耳盜鈴、自欺欺人」。

針對當前美國對中國極限施壓，夏寶龍鼓勵香港工商界同企業家要有「烈火金剛」咁嘅堅毅品質，紮根香港，繼續做推動經濟發展嘅中堅力量，延續愛國愛港嘅優良傳統，呼籲企業界要正確認識自身事業同香港、國家發展息息相關，繼續睇好香港、支持香港、投資香港，吸引優質資源落戶香港。

夏寶龍警告本港工商界，指「背叛祖國、背叛香港的人，永遠不會有好下場」，認為若以為「向美國獻媚、向美國跪低、向美國求饒，就能夠換來和平、換來尊重、換來發展，那是極其幼稚。」《I》