烏克蘭總統澤連斯基周二（8日）表示，烏軍近期喺頓涅茨克戰區捉咗兩個幫俄軍打仗嘅中國人，令俄烏戰爭出現新一波爭議。翌日（9日），澤連斯基再透露，指根據烏克蘭情報掌握，目前已知有155名中國籍人士被俄方招攬，喺前線為俄羅斯作戰。佢指責俄羅斯繼搵北韓之後，現時仲拖埋其他國家落水，批評莫斯科嘅舉動係「錯上加錯」。

法新社引述烏克蘭官員消息，實際數字可能更高，烏克蘭政府已經取得168名中國籍人士嘅個人資料，包括佢哋嘅姓名同護照資料。澤連斯基話，呢啲中國籍士兵係透過俄羅斯喺中國嘅社交媒體，包括中國主流平台同抖音（TikTok）嘅廣告所招募，更直指北京當局絕對知情。

澤連斯基仲表示，烏克蘭準備將已經捉到嘅中國籍士兵，攞嚟同俄方交換烏克蘭嘅戰俘，並指出美國政府對中國公民參與俄烏戰事表示震驚，「以我睇嚟，美國係覺得呢件事係絕對唔可以接受。」

不過，中國方面就「扮晒懵」，喺周二外交部例行記者會上，中國外交部發言人林劍表示，中方正喺向烏克蘭核實情況，強調中國政府一直都要求自己國民遠離戰區，避免以任何形式捲入武裝衝突，尤其係參與任何軍事行動。

自2022年俄羅斯全面入侵烏克蘭以來，北京政府一直聲稱持「中立」立場，但隨住戰事升級，中國就逐步深化同俄羅斯嘅經貿合作，引起烏克蘭同西方國家極大不滿，甚至將中國部分企業列入制裁名單。

中國方面一直批評西方對俄羅斯嘅制裁措施係單方面行動，並且拒絕參與大規模制裁，指摘北約東擴係戰爭爆發嘅根本原因。但北京政府同時謹慎處理與俄羅斯嘅合作，避免觸犯西方嘅制裁紅線，並且多次強調佢哋冇直接支持俄羅斯嘅軍事行動，更公開拒絕向俄方提供軍事援助同武器裝備，並重申呼籲各方透過對話解決問題，避免局勢進一步複雜化。

澤連斯基曾喺聯合國大會上公開批評中國嘅和平方案「有缺陷」，同時指控中國一面扮調停人，一面又協助俄羅斯攻擊烏克蘭嘅核電廠設施，引起國際間廣泛關注。北約亦表明，中國係俄烏戰爭嘅「關鍵助力者」，並警告北京嘅政策將會持續對歐洲安全構成系統性威脅。《I》