歐洲央行行長拉加德一喺維也納「霍夫堡對話」活動發表題為《資本新時代》嘅演講，警告歐洲人工智能模型同算力高度依賴美國，一旦供應商撤回使用權或者修改條款，衝擊會同時波及所有行業，形成「任何貿易夥伴都未曾對歐洲擁有過」嘅籌碼，隨時可以喺關稅或者數碼稅談判用嚟施壓。佢形容歐洲面對「尷尬嘅抉擇」：要麼因保護唔到數據而放慢採用、錯失增長；要麼快速採用但高度依賴，冒住失去按自身價值觀組織經濟嘅自由。

拉加德指出，未來幾年人工智能將負責邊境查驗貨物、篩選要審計嘅報稅表、調度鐵路、監察病房病人同處理銀行支付。數字上，美國去年推出59個具影響力嘅AI模型，中國35個，法國同英國各得一個；美國擁有全球四分三AI算力，歐洲只佔5%。歐盟統計局調查更發現，考慮過採用AI但最終放棄嘅企業，接近一半係憂慮數據保護。

金融層面，佢警告歐元區家庭目前持有約4,400億歐元（約4萬億港元）美國科技企業股票，而且持倉大多經投資基金，市場一旦調整，基金就要喺跌市沽貨應付贖回，歐洲儲戶必受牽連。美國科技巨頭去年發債逾1,000億美元（約7,800億港元）支撐AI投資，推高美國長債收益率，而歐元區長期利率跟隨美息走，歐洲等於透過自身借貸成本為呢輪熱潮埋單，「問題係歐洲能唔能夠同時分到增長」。歐央行上周四先至再加息四分一厘至2.5厘，拉加德當時已點名AI龐大融資需求係推高長債息率嘅主要因素之一。

佢強調，歐洲勞動人口未來25年每年減少逾100萬人，公共投資每年仲有超過1,000億歐元（約9,100億港元）缺口，AI係提升生產力嘅最佳機會，若迅速普及，十年內生產力最多可提升4%。好消息係歐元區企業今年約一成投資投向AI，用AI返工嘅僱員比例兩年間倍增至過半。

解決方案方面，拉加德提出三步：首先擴建數據中心，歐洲現有容量已經唔夠用，缺口十年內恐擴大六倍以上，填補成本連晶片可能高達6,000億歐元（約5.5萬億港元）；其次發展「夠用」嘅本土開放模型喺歐洲基建上運行，令斷供威脅失效，佢坦言現時最強嘅開放模型係中國嘅DeepSeek同Kimi，但實驗室隨時可以停止開放；第三係守住ASML呢類「無人可以移除」嘅供應鏈環節。佢讚揚法國初創Mistral AI上周由三星電子領投嘅30億歐元（約273億港元）融資係歐洲科企史上最大股權集資，估值逾210億歐元（約1,900億港元），但強調一輪唔夠，歐洲家庭每年儲蓄1.4萬億歐元（約12.7萬億港元），欠缺嘅係將資金導向本土嘅市場。

今次警告並非無的放矢。今年美歐因關稅、格陵蘭以及特朗普政府撤走駐德美軍等問題摩擦不斷。更具體嘅先例係今年6月，美國商務部以國家安全為由勒令Anthropic暫停所有外國人使用其Claude Fable 5同Mythos 5模型，公司被迫全球停用逾兩星期。法國經濟部長萊斯屈爾 (Roland Lescure) 本月初喺三藩市亦直言：「如果歐洲AI只係得Mistral一間，我哋就完蛋。」