特首李家超於去年《施政報告》提出開展愛國主義教育，公務員事務局局長楊何蓓茵喺立法會表示，公務員學院著重「心態培養」，將開設中國近代史課程，加強公務員國家觀念、國安意識同愛國精神。工聯會黃國表示有部分公務員持外國護照，質疑佢哋接受愛國課程時會否尷尬。

黃國表示支持政府實施愛國主義教育，問及對首長級公務員有否國籍要求，佢指《基本法》有規定可以顧問形式聘請外籍公務員，惟接受愛國教育或有違愛國精神，甚至有「大矛盾」。

佢舉例質疑，假如一位持有英國護照嘅公務員，喺課堂上聽到講林則徐抵抗英國侵略嘅故事，會唔會感到尷尬。黃強調唔係歧視外籍公務員，但希望了解愛國主義課程係唔係必須參加，如為強制字眼用「國情教育」更佳，否則會流於形式主義。

楊何蓓茵澄清，《基本法》未有規定公務員國籍，但係要求持有香港永久居民身份，所以有啲公務員可能係雙重國籍。佢指出，唔同國家對於國籍嘅解釋唔同，例如中國唔承認雙重國籍，所以處理起來會有啲複雜。

楊何蓓茵強調，冇論點樣，公務員都需要對國情有基本認識，包括實地考察或者透過將會推出嘅中國近代史或文化課程，培養心態同文化認同，呢啲都包括外籍或者華裔公務員；但係佢冇直接回應課程係唔係強制性參加。

有網民諷刺反問：「林鄭個仔，689個女會唔會尷尬?」、「用美國科技 去日本旅行 用英文作官方語言會唔會尷尬？」亦有網民認為：「只要薪酬夠高，回報夠高，就完全唔會尷尬」。

翻查資料，2022年10月，黃國喺立法會會議上提出為落實「愛國者治港」原則，首長級公務員不應被允許擁有雙重國籍，即使佢哋曾經宣誓效忠特區政府，都不足以解決雙重效忠問題。當時政制及內地事務局局長曾國衞回應時表示，所有公務員都要宣誓擁護《香港基本法》及效忠特區，所以已經符合「愛國者治港」原則，暫時無意改變公務員嘅國籍規定。

與此同時，港府成立嘅「愛國主義教育工作小組」29日召開小組首次會議，政務司長陳國基話，小組已經訂出咗工作嘅重點，包括透過軟性手法嚟介紹國家歷史同成就，希望引起大家嘅認同感，唔係硬銷，仲會同愛國愛港教育團體一齊搞各類愛國主義教育活動。

陳國基表示，推展香港愛國主義教育嘅工作會參考中國嘅愛國主義教育法，但都會因應香港嘅實際情況「因地制宜」。目標係要令愛國愛港成為香港嘅核心價值，令愛國精神可以深入民心。

佢表示，工作小組會設立學校教育、本地社區、歷史政經文化同埋傳媒宣傳呢四個分組，聚焦探討同埋提出具體嘅建議措施，訂出三個工作重點。以學校教育為例，要搞多元化活動，喚起學生興趣，令愛國主義教育可以喺校園裏面普及；唔單止係「死記硬背」相關知識，而係用軟性方法，透過向學生介紹國家歷史同各方面成就，從而引起佢哋嘅認同感；同埋要「揾好拍檔」，靠社會上嘅愛國愛港教育團體、地區團體同藝術團體等，搞各類型愛國主義教育活動。

佢強調，政府冇計劃就愛國主義教育立法，期望透過政策措施或活動，讓市民、學生同年輕人多了解國家，從而達到愛國效果，強調唔會有法律後果。《I》