綜合《自由亞洲電台》、《明報》、《獨媒》等多間媒體報道，經常被中央同港府痛斥嘅英國美國，近期相繼有官員訪問香港，而建制團體嘅示威就被煞停，葉劉甚至大搞所謂嘅「民間外交」，顯示出中方希望阻止同西方關係進一步惡化，令經濟危機加劇。

結束訪華行程嘅英國印太事務大臣卓雅敏（Anne-Marie Trevelyan），上星期三喺社交網站上載相片，話自己啱啱同香港財經事務及庫務局局長許正宇見面，而且自己係2018年後首位訪港嘅英國外交部官員。

佢透露同許正宇嘅會面中，雙方討論咗香港人權、自由受侵蝕嘅問題，同埋英港兩個國際金融中心嘅合作等。卓雅敏用「好」嚟回覆傳媒嘅查詢，指「同唔同嘅人見面係好事」。

另外，主要負責亞洲、中東金融罪案相關工作嘅美國財政部副助理部長Jesse Baker亦喺呢個星期低調訪港，以「特別講者」身份出席由反洗黑錢組織ACAMS喺4月21至23日舉行嘅亞太區論壇。

經常被指「收錢開工」嘅激進建制派組織「保衛香港運動」，原定上星期三喺美領外舉行集會「強烈譴責美國詆毀香港人權法治」，但發起人傅振中突然通知傳媒，集會因「外在環境變化」而取消。

傅振中唔係第一次突然取消抗議。今年2月，「保衛香港運動」亦曾因「外在原因」而臨時「押後」喺美領外「譴責美國魔鬼政客提名黎智英角逐（諾貝爾）和平獎」嘅集會，當時佢稱因為「無法控制嘅突發原因」而押後集會，但未有透露實際原因或押後至何時。

行政會議召集人葉劉淑儀上星期二宣佈，由佢成立嘅「匯賢智庫」5月中會喺香港舉辦「全球繁榮峰會」，邀請合共200名海外學者、前外交官等出席，其中包括美國前代理助理國務卿董雲裳、前美國駐港澳總領事唐偉康等前美國官員會參加，就地緣政治、大國競爭等議題交流，推動「民間外交」。

香港浸會大學前政治及國際關係助理教授黃偉國分析，美國國務卿布林肯而家喺中國訪問，加上傳出美國打算進一步對中國實施金融制裁，阻止中國繼續參與俄烏戰事，所以中方希望阻止同美國嘅關係進一步惡化，令經濟危機加劇，因此港府亦要剎停呢類反美示威，以防被指唔友善。佢又分析，在整體大環境唔變嘅情況下，相信港府同英美官員嘅會面係試探性質、互摸底牌嘅策略。

黃偉國又認為，在二十三條嘅新時代下，連工聯會勞動節亦唔再舉辦遊行、改以酒會代替，反映親北京組織唔希望舉辦示威遊行呢類會令人聯想到國家安全嘅活動。而「保衛香港運動」呢類「政治大龍鳳」，無論外國政府抑或傳媒都唔會太重視，所以亦再冇太大嘅存在價值。《I》