當局強推國安教育嘅動作越黎越多，全港有四成嘅官立學校都陸續推出「國安年報」，向外界誇耀佢哋喺國安教育方面嘅「成就」，包括撤除圖書館裏嘅所有「禁書」、強迫學生觀賞愛國電影，甚至要審查學校內嘅聖誕歌曲比賽等。

綜合《自由亞洲電台》、《明報》報道，教育局頒佈嘅《國家安全：學校具體措施》指引要求本地課程嘅中、小學同埋幼稚園每年提交「維護國家安全及國安教育相關措施」嘅年度報告同埋工作計劃，但冇要求學校主動公開呢啲文件。

現時全港64間官立學校當中，有27間今年已經主動喺校網公開咗相關年報同埋工作計劃，佔比大約四成，比舊年統計多咗差唔多兩倍。

喺眾多官立學校公開嘅年報入面，九龍工業學校嘅年報最為詳盡，有22頁之多，唔單止報告措施嘅執行情況同成效，仲附有詳細記錄該學年嘅56個「國民教育活動」、外聘導師同講座嘉賓嘅名單等，例如安排表演者喺變臉表演時，變出「國家安全、共同守護」等條幅。

年報附件仲有呢間學校圖書館嘅藏書審核副本，顯示因為「或有敏感內容」，而抽出同註銷咗《太子黨盟主之戰》、《中國知識份子淪亡史》、《毛澤東和他的女人們》等共7本政治類書籍。

而年報亦都透露咗一啲老牌官校嘅國民教育活動內容，比如軒尼詩道官立小學（創校於1949年）安排學生拍攝「《憲法》和《基本法》學生大使」影片，用嚟宣傳國慶同埋清明節；同埋安排學生參加愛國電影《我和我的祖國》放映會，以培養學生對國家發展嘅關注。

觀塘官立中學和新界鄉議局元朗區中學表示停用電子藏書(HyRead)服務。趙聿修紀念中學則舉辦抗日紀念日主題書展，盼學生「銘記中國人民抗日那份艱苦卓絕的愛國主義的偉大民族精神」。

而元朗區嘅傳統英中趙聿修紀念中學，年報裏指出學校有機制審視學生會政綱同聖誕歌唱比賽曲目，以防止違規行為出現；同埋2022年12月喺上課時間安排全校學生觀賞江澤民追悼大會直播。軒尼詩道官立小學(銅鑼灣)就喺校友同樂日要求回校嘅舊生守法、唔危害國安。

被美國制裁嘅特首李家超，去年發表任內第二份施政報告時表示，政府將會展開愛國主義教育，增強市民對國家同中華優秀傳統文化嘅認同，自覺維護國家統一同民族團結，將愛國主義教育納入國民教育體系。

李家超當時話，由政務司司長領導嘅「憲法和基本法推廣督導委員會」將會擴大職能，新增涵蓋愛國主義教育，又會成立「愛國主義教育工作小組」，協調政府部門同非政府機構推動國民教育，與「中華人民共和國愛國主義教育法」內容對接。康樂及文化事務署亦會成立「弘揚中華文化辦公室」，專責策畫及舉辦推廣中華文化歷史嘅活動，並舉辦「中華文化節」。《I》