港澳辦料美國對港制裁成「持久戰」  痛斥拜登為強硬「反華鷹派」
港澳辦料美國對港制裁成「持久戰」 痛斥拜登為強硬「反華鷹派」

港澳辦旗下嘅「全國港澳研究會」,最近發表題為「中美戰略競爭背景下美國對香港的制裁:發展演變、主要特點與應對路徑」嘅分析文章,預期美國對港頻繁實施制裁將成為「持久戰」。呢篇文章維持北京當局嘅一貫說詞,即全部責任均不在我方,一切都係美帝陰謀。

 

文章首先指出,喺中美戰略競爭背景下,美國對香港頻繁施加制裁,既係美國「干預」香港事務嘅具體方式,亦係美國對中國戰略嘅重要組成部分。文章將過去幾年美國對香港嘅制裁分為幾個階段:

 

第一階段係特朗普政府上台後,中美關係「穩中向好」嘅趨勢結束,兩國進入戰略競爭。

 

第二階段由2019年開始,香港爆發「修例風波」,美國藉此「干涉」香港事務,包括時任總統特朗普簽署嘅「香港人權與民主法」,係特朗普上台後首次以法案形式制裁香港。

 

喺第三階段,特朗普為咗喺大選中獲勝,打出「中國牌」,而香港特殊嘅經濟、政治地位,使其成為特朗普政府後期對中國戰略嘅「重點地區」。

 

而美國總統拜登上台後,美方對港制裁進入第四階段,拜登成為更強硬嘅「反華鷹派」,繼續堅持香港喺對中國戰略中嘅橋頭堡地位,延續咗特朗普政府對港嘅制裁政策。

 

文章指出,對香港嘅制裁係美國對中國戰略嘅組成部分,必然會考慮從中國影響最大嘅領域入手,而香港係中國重要嘅離岸金融市場,因此金融制裁成為美國對香港制裁嘅重要選項。

 

例如,2020年5月,特朗普宣布取消香港特殊地位同商業優惠措施;同年6月,時任美國商務部部長發表聲明,正式取消對香港嘅特殊貿易待遇。2020年6月《港區國安法》推出後,美國宣布制裁近20名香港重要官員及部分官員家屬,限制被制裁人嘅簽證及金融行為,凍結其喺美國嘅資產。

 

文章表示,美國對港制裁,唔單止制裁主體全面,而且制裁幾乎覆蓋香港所有重點領域,又話雖然美國對港制裁手段種類繁多,針對個人實施制裁亦並不少見,但喺對港制裁中頻繁且大範圍實施個人制裁,實屬少見。

 

文章預期,從美國國家戰略角度睇,中美戰略競爭將係美國對中國嘅主戰略,美國將會繼續加大「干預」香港事務嘅力度,對港頻繁實施制裁或將成為「持久戰」,勢必會對中國帶來一定嘅負面影響。呢啲負面影響包括損害中國國安、損害一國兩制嘅國際聲譽、阻撓維護中國國安嘅法律在港實施、刺激美國盟友干涉香港事務嘅「連鎖反應」。

 

發佈時間: 2024年07月05日 13:51
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.