近期中國內地有兩單不幸又離奇嘅案件引發關注。第一單發生喺湖南，網傳湘潭大學經常有人丟失外賣，一學生便向自己外賣投毒，導致偷外賣嘅學生中毒身亡。第二單發生喺廣東，一名經常喺抖音上炫富、自稱「富二代」嘅男子，被拆穿後竟揸車故意衝撞人群，撞完仲落車狂撒鈔票，造成6死20傷，佢日前已經被執行死刑。

據內媒《大風新聞》報道，近日網傳湖南省湘潭大學發生一宗投毒案，該校琴湖學生公寓內有人經常丟失外賣，一學生便向外賣內放入「秋水仙堿」，導致偷外賣嘅學生中毒身亡，警方證實一名張姓研究生多重器官衰竭死亡，其同寢室友涉有重嫌。

湘潭市公安局雨湖分局20日凌晨通報，稱2024年4月12日15時41分接群眾電話報警，湘潭大學在讀研究生張某某（男，25歲）疑似被人投毒，接警後，立即開展調查工作。

經查，4月7日，張某某因身體不適到醫院就醫。4月13日，張某某經多方搶救無效，因多重器官衰竭死亡。公安機關偵查發現，與張某某在校同寢室嘅周某某（男，27歲）有重大作案嫌疑。目前，犯罪嫌疑人周某某已依法刑事拘留，案件正在進一步偵辦中。

不過校方則否認投毒一事。湘潭大學工作人員回應媒體時表示，該校確有學生死亡，但呢名學生唔存在被投毒嘅情況。又話警方已經介入，死因仍在調查，身分資訊及死因將喺調查清楚後發布聲明。

而死者姐姐就喺微信上試圖闢謠，表示「我的弟弟因急性中毒己於2024年4月13日下午13時07分10秒，在長沙湘雅重症監護室離世。警方已經介入，目前案件正在偵破階段。我看到網上的一些謠言，令人痛心，製造偷外賣謠言的人也將會被追究法律責任。」

另一邊廂。廣東一名溫姓男子，經常喺抖音上炫富，po出一啲精品、豪車相片，想同其他人炫耀佢係個「富二代」。不過冇幾耐之後，佢嘅富二代形象就被其他富二代揭穿，話佢根本唔夠格，甚至連富二代嘅圈子都入唔到，所以只能喺網上欺騙唔知情嘅網友。

當佢嘅謊言被戳穿嘅時候，佢突然覺得自己人生就好似跌落谷底咁。去年1月11日佢攞咗6000元人民幣嘅私房錢，再揸自己爸爸名下嘅BMW房車離開居住嘅城市，決定去另一個城市重新開始。不過喺行車途中，佢同收費站嘅工作人員發生衝突後被激怒，竟然決定亂撞行人，導致6個人當場死亡，另有20多人受傷。

令人震驚嘅係，根據網上片段顯示，佢撞完後仲落車大灑鈔票，好似企圖證明自己唔係假富二代。由於佢嘅行為太過恐怖，當局甚至一度懷疑佢嘅行為係同恐怖襲擊有關。之後廣州市中級人民法院以「以危險方法危害公共安全罪」判佢死刑。今年4月19號，佢被送去刑場執行死刑。《I》