今次美國襲擊伊朗拉臘克島，唔係無緣無故。美國一直要阻止伊朗進一步限制霍爾木茲海峽航行，而美方就話，伊朗革命衛隊當時準備用火箭發射水雷，令國際航道受到威脅，所以先採取軍事行動。但呢個始終係美國嘅情報判斷，外界目前未有獨立證據確認伊朗真係準備布雷。可能性有兩個：第一，伊朗真係準備用水雷收窄航道；第二，美國誤判，或者將一個尚未正式執行嘅軍事準備，當成迫在眉睫嘅攻擊。不過，對美國嚟講，伊朗布雷就係一條紅線。因為一旦伊朗可以用水雷令船隻唔敢通過，就等於逐步將霍爾木茲變成由伊朗單方面批准嘅水道。美國唔能夠接受呢個結果。

伊朗未必一定要將霍爾木茲完全封死，因為完全封鎖會打擊自己嘅出口收入，亦會令海灣國家、美國同其他國家更容易聯手對付佢。伊朗更可能想控制通行速度、通行路線同船隻種類，令商業船可以有限度通過，但唔可以恢復戰前自由航行。呢個亦解釋到點解伊朗同阿曼會傾臨時航道方案。入灣船隻主要經過伊朗水域，出灣船隻就經過部分伊朗水域，再經阿曼水域；軍艦唔包括喺內，商業船先可以按條件通行。但對伊朗嚟講，阿曼一側嘅航道亦唔可以變成大規模替代通道。如果大量船隻都改經阿曼水域，入出霍爾木茲就可以逐步避開伊朗主導嘅航線，伊朗對海峽嘅控制權、通行收入同談判籌碼都會被削弱。所以雙方而家都未完全封死霍爾木茲，但亦都唔接受對方單方面控制。美國要維持航行自由，伊朗就要維持對通行嘅否決權。

拉臘克島被炸之後，伊朗向約旦美軍基地發射導彈，某程度上就係交換一拳。伊朗唔係直接攻擊油輪，亦冇即刻炸卡塔爾、阿聯酋或者沙特嘅能源設施，而係攻擊美軍基地，目的係向美國表明：你可以打伊朗軍事目標，但伊朗亦有能力打擊你喺區內嘅軍事網絡。問題係，下一拳就輪到美國。特朗普已經話會狠狠打擊伊朗；伊朗官員就警告，如果美國再攻擊，伊朗嘅回應可能強大幾十倍。所以而家要睇嘅唔係雙方講幾多狠話，而係下一輪攻擊會打乜嘢。如果美國只係再打同布雷有關嘅軍事設備，而伊朗只係用導彈或者無人機攻擊美軍基地，雙方可能仍然維持有限度交換。但如果美國攻擊伊朗能源設施，或者伊朗直接攻擊油輪、液化天然氣船，事件就會由美伊互打，變成全球能源航道危機。

判斷雙方有冇控制局勢，第一個指標就係有幾多隻船真正通過霍爾木茲。近期船流量曾經出現短暫反彈，但始終冇形成穩定恢復。可見貨運船數量曾經由十七隻跌到七隻；週末星期六約有十三隻，星期日跌到四隻；到星期一亦只有五隻，四隻入灣、一隻出灣，低過十日平均約十四隻。更加重要係，星期一五隻船入面，零隻係液體貨油輪，只有一隻空載氣體船同三隻散貨船。呢個代表霍爾木茲唔係完全冇船行，但最重要嘅原油、成品油同液化天然氣船，仍然唔敢大規模通過。當然，船隻如果關閉AIS定位訊號，就未必會計入數字，所以實際流量可能高少少。但船公司要關閉定位訊號先敢行，本身已經反映商業風險仍然非常高。

第二個指標就係國際油價。當外交氣氛較好、市場憧憬伊朗同阿曼可以安排臨時航道時，布蘭特原油曾經回落至每桶八十七點八四美元。到八月三十一日，美伊重新交火，布蘭特升百分之二點七，收報九十點四九美元；星期二再升至九十一點零五美元。油價未去到失控式暴升，反映市場仍然相信部分海灣原油可以繼續轉運，全球亦有庫存同有限替代路線。但油價重新企返九十美元以上，就代表市場已經重新計入供應中斷風險。

所以船數同油價要一齊睇。如果船數由個位數升返十幾隻，油價亦由九十美元以上回落，代表雙方交換一拳之後，仍然有默契。相反，如果船數繼續跌，油價繼續升，尤其再有油輪被截停或者擊中，就代表伊朗下一輪反擊可能唔再只係針對美軍基地。今次真正嘅成敗，唔係美軍炸中幾多個發射器，而係伊朗有冇再布雷、美國有冇再攻擊，以及商船數量會唔會繼續下降。只要油輪同液化天然氣船仍然唔敢通過，所謂有限打擊就未算真正受控。