同《文匯大公報》關係密切嘅《點新聞》，昨（16日）以標題「假王子真騙子？患創傷壓力症候群要睇醫生」為標題發表文章，指雖然杜拜王子Sheikh Ali推遲啟動禮「疑似騙子伎倆」，但對於呢一位「說好香港故事」嘅尊客，「哪怕是假王子真騙子」，仍應展示出積極態度。又指港人經歷「美欺事件」後開始胡思亂想，「凡事先起底的做法不利招商引資。」

文章首先以「盛事之都」形容香港，稱杜拜王子Sheikh Ali喺鎂光燈之下彷如「歌舞巨星」般氣場十足，燦爛招牌笑容同優雅嘅舉手投足征服唔少港媒，有米又型仔嘅形象成為媒體寵兒。又指出佢訪問邀約不斷，先後訪問咗數碼港、恒生大學，更曾出任恒生大學榮譽教授，而港府亦畀佢王室一般嘅禮遇。

文章續稱，杜拜王子突然以有要務需返鄉為由，推遲家族辦公司啟動禮，指「這般操作讓人始料不及」，令經歷過「美欺事件」嘅港人難免胡思亂想，各大媒體紛紛挖料，抖出王子曾為歌手、無投資經驗、資金來歷不明、辦公室高層涉違規等舊賬。

文章表示，港人啱啱經歷咗「美欺事件」，害怕再次受傷可以理解，但又話港人如果被主觀情緒牽着鼻子走，凡事先起底的做法並不利招商引資。雖然王子此舉疑似騙子伎倆，但「也不能完全否定他真回來的可能性」，而且冇論佢係咪假王子真騙子，「我們仍然應展示出積極的態度，顯示非凡的氣度，敞開心扉歡迎各國投資者來港尋找機會」，

文章又幫港府開脫，稱「一鍋粥裏永遠不缺老鼠屎」，世界充斥着法外投機分子，任何國際都會都沒有挑剔投資者嘅權力。對於資金和機遇政府本就應盡力爭取，先表示歡迎、提供便利，後小心求證、敲定細節。之後話港府的確有改善之處，官方活動嘅邀請嘉賓一定要做好背景調查，唔好幫騙子背書。但隨即又將責任推畀媒體，話佢哋唔應該基於流量跟車太貼、盲目蹭熱點，成為騙子幫兇。

最後，文章要大家「口下留情」，否則會嚇走有意來港嘅投資者們。仲要港人「準備好開放的心，去相信、抓緊下一個光明機遇」。

對於黨媒此番說法，有網民嘲諷：「老鼠屎你食開，唔好當大家都係」、「咁樣幫騙子，平時搭開棚？」、「請問大公文匯又有無對佢口中的反對派、黑暴有口下留情過呀？」、「精神病，有咩人會同情騙子」、「照大公報咁樣講嘅話以後香港所有被騙徒呃晒d錢嘅苦主一律不得報警追究，否則大刑侍候！」、「平時就往死裡打，對呢啲人就口下留情」、「所以比新加坡串尻囉，人地要質不是量」。

亦有網民認為：「咁係咪即係間接認左呢個係雞棚」、「大公証實香港而家係老鼠屎之都，歡迎大家黎搵大錢」。《I》