雖然本港如今面臨公營醫療系統人手嚴重短缺嘅問題，但為咗體現對大灣區嘅支持，港府計劃喺今年中試行「跨境醫療直通救護車計劃」。醫務衞生局局長盧寵茂表示，計劃並不局限於香港居民，未來非港人亦可使用該服務，「讓本港優質醫療能夠提供幫助」。

醫務衞生局提交立法會嘅文件建議，以港大深圳醫院同澳門人伯爵綜合醫院作為試點，今年年中起有救護車可直送病人到本港公立醫院接受治療，計劃為期一年，預計正式啟動直通運送機制時，會有約數十宗個案。計劃實施前，會聯同深圳和澳門政府演練，當局會適時檢討考慮是否擴展計劃。

盧寵茂話：「如果唔係香港居民，唔會係一啲輕症或者普通嘅病症嚟嘅，絕對係有醫療需要嘅，而香港優質嘅醫療能夠幫佢哋。尤其而家我哋係一個國際醫療創新樞紐，雖然我哋面對人手短缺嘅問題，但個別個案都可以發揮香港醫療嘅優勢同埋我哋嘅能力…就算唔係本港居民我哋都會提供。」

至於收費方面，盧寵茂指，當局有機制，舉例澳門嘅病人，本身需要來香港接受治療，一些高難度嘅手術或治療，當局係有機制收回有關服務嘅成本同整個過程嘅費用。

翻查資料，截至今年1月底，過去12個月醫生流失率為5.4％，護士流失率為8.6％，較去年1月底的6.6％及10.6%下降。目前已有2,413名醫護人員接受退休後重聘，包括150名醫生和537名護士。整體而言，過去12個月，共有351名離職醫及2,321名離職護士，新聘嘅醫生同護士分別有587位及2,539位，錄得正增長。

雖然本港醫療人手短缺嘅情況略有改善，但輪候時間仍居高不下。其中九龍區一直被視為「公營醫療重災區」，根據醫管局最新一期公布嘅專科門診輪候時間，被判定為穩定嘅外科、耳鼻喉科同眼科，新症平均嘅輪候時間大多接近甚至超過100個星期，其中最誇張嘅係九龍西眼科新症輪候時間，需要204個星期，約需要四年先可以見到醫生。

而其他常見嘅專科，例如骨科，手術嘅輪候情況同樣嚴峻，而家約有36,000宗個案正在輪候全關節置換手術，新界西聯網嘅輪候時間平均最長要等上7.2年（87個月）先可以做手術。

至於本港急症室等候時間，根據醫管局嘅最新數據，而家只有長洲醫院嘅等候時間係大約一個鐘頭，其他醫院全都需要等候一個鐘頭以上，而等候時間最長嘅係屯門醫院，更要等超過八個鐘頭。《I》