《自由亞洲電台》報道，今年中國十一國慶，港府一心搞大活動，目的係想增強市民嘅「愛國」情懷，順便推動一下唔太景氣嘅經濟。政府推出咗超過400項慶祝活動，包括半價睇戲、交通同食肆優惠等，不過，唔少市民對於咁多慶祝活動竟然「唔知情」，亦冇打算國慶當日出街消費。就連嚟香港嘅內地遊客都表明唔會留宿，睇嚟政府嘅如意算盤未必打得響。警方亦拘捕咗一個男子，涉嫌多次破壞國慶裝飾。

香港各大景點到處都掛滿國旗，慶祝中國75周年國慶嘅海報鋪天蓋地。政府努力谷經濟，希望吸引遊客趁國慶黃金周嚟香港玩，亦希望鼓勵市民多啲支持本地消費。400多項慶祝活動應有盡有，仲有唔少消費優惠，包括半價睇戲、交通同食肆優惠等等。

但咁多優惠係咪真係吸引到本地市民呢？喺尖沙咀返工嘅張先生話，由於當日要返工，佢冇打算慶祝：「其實我都唔太清楚有啲咩活動，除咗每年都有嘅煙花。我覺得宣傳唔夠，亦冇乜興趣，即使有折扣都好，都未必會特別出街消費，感覺唔係有咩特別嘅慶祝氣氛。」

至於陳小姐就話會同朋友出去玩，不過同國慶無關：「同平時冇乜分別，亦唔知政府有咩優惠安排。遇到就會參與，例如買杯咖啡之類，但唔會特登去搵啲優惠。多咗一日假，咪開心囉。」

大學生陳先生亦表示唔會特別慶祝：「都係留喺屋企，因為我係學生，冇乜地方去。其實我住嗰度附近掛咗好多橫額，成日都見到國旗同區旗，年年都見到，我覺得搞到咁誇張，明明係一件簡單嘅事，搞到咁天花龍鳳。」佢仲話自己對五年前嘅10月1日仲有深刻印象。

港府一心搞「盛事經濟」，但香港民意研究所早前公布嘅調查顯示，市民對「盛事」冇乜感覺。至於「盛事」係咪真係能夠推動經濟，最多人提到嘅關鍵詞竟然係「浪費」、「冇用」、「失敗」等。浸會大學副教授陳家洛分析指，香港嘅社會經濟結構，相關活動只會有短暫嘅經濟效果，唔會持續。

本地人反應一般，咁遊客呢？嚟自東莞嘅小軍表示，唔知香港有咩活動，但國慶已經約咗朋友喺深圳，所以唔會留港：「兩地嘅國慶氣氛應該差唔多，可能國內嘅氛圍會濃厚啲。」

而嚟自深圳嘅遊客西西就話知道港府搞咗好多活動，但因為住喺深圳，所以當晚會返去：「如果冇咁趕嘅話，我會考慮留低睇下啲表演，不過難得嚟一次，走得太趕都有啲可惜。」

雖然香港已經開關兩年，業界預計今年黃金周嘅旅客數字會比舊年有所回升，可能有120萬旅客來港，不過要回復疫情前水平，估計仲要兩年時間。

同國慶「萬眾歡騰」嘅氣氛對比嘅，仲有警察。反送中已經過去五年，但警力冇放鬆。廣東道、梳士巴利道同天星碼頭一帶，國慶前夕已經見到警察部署。警方亦拘捕咗一名男子，涉嫌破壞五宗國慶裝飾，初步懷疑佢係為咗發洩對社會不滿，並唔係特意針對中國。《I》