內地知名珠寶企業，包括央企中國黃金、國企山東黃金喺北京嘅多家門店近日突然關閉，唔少投資者寄存喺店內嘅黃金無法贖回，預計累計損失超過4億人民幣。但係，中國黃金就回應稱，出事嘅門店係加盟店，「沒有法律依據要求總公司直接承擔消費者的損失」。

綜合每日經濟新聞、財聯社等內媒報道，山東黃金、中國黃金數間加盟店，以安全、暫存黃金升值為由，推銷黃金託管服務，說服顧客將黃金留喺店裡，去年底卻突然倒閉，老板「走佬」。

涉事中國黃金概念店位於北京雙井富力廣場，開業逾十年。去年底突停業，連帶顧客喺店內寄存、至少70公斤黃金無法取出，價值超過5,000萬元，涉及超過70名顧客。報道指，中國黃金北京概念店嘅工作人員宣稱係總店，受害者遂認為該店係中國黃金喺北京嘅總店，認準中國黃金嘅招牌安心投資，在該店選擇店員推薦嘅「無憂預定」項目投資金條產品。該項目聲稱購買金條後可以將金條存於店內，每年每50克回贈1.25克黃金，而且金條可以隨時取出或按當天金價折算現金。

有受害者指出，自己喺2016年已經透過「無憂預訂」模式買咗金條，之後每年除咗正常續簽，仲會再買100克。今年3月，佢本來打算續辦黃金托管嘅業務，不過同工作人員喺微信傾嘢嗰陣，發現公司竟然倒閉咗。工作人員只係話「你去派出所報案啦」，指公司「沒跑」、「就是破產了」。

另一受害者講，呢間「中國黃金北京概念店」喺去年12月27日結業，之後佢就發起維權，而家大概有70人參與，大部份都係雙井富力廣場中國黃金概念店嘅受害者。今年1月底，佢喺維權群裏做咗一次統計，發現40人無法提取嘅黃金大概有60公斤。

除咗北京中國黃金概念店，同位於北京貴友大廈嘅山東黃金等門店都傳出倒閉，許多受害者喺店內購買嘅黃金無法贖回，累計損失總值超過4億元。多名受害人報警求助，並向有關負責人追討損失。

事實上，好多消費者都係因「中國黃金」呢個招牌而來。因為中國黃金係黃金珠寶領域著名嘅大央企，亦係上市公司，位列行業前三名，備受消費者信任；但如今中國黃金卻回覆受害者「賠不了」，因為丟黃金嘅係加盟店而唔係直營店，呢啲係加盟店自己開展嘅業務，中國黃金冇授權，所以佢哋冇責任。

受害者自己調查之後發現，收款方原來唔係中國黃金，而係一間「北京三鼎原黃金珠寶有限公司」。不過，喺「無憂一年續」嘅發票同埋「無憂金條」嘅預定證書上都有中國黃金嘅字樣。佢哋亦發現，除咗北京之外，河南嘅加盟店都有「走佬」嘅情況。

有受害者講，中國黃金一開始對呢件事嘅態度係「矢口否認」，話涉事店舖係加盟店，但新春之後，佢哋嘅態度變咗，承認有啲責任同積極協助，「但也不承認有多少責任，一切都等着」。

據報道指出，截至去年底，中國黃金全國共開咗3,642間門店，其中直營門店105間，其他3,000幾間都係加盟店，佔比高達97.1%。報道亦提到，加盟店只需要5萬元保證金同埋2至4萬元嘅管理服務費。中國黃金原本希望加盟店可以擴大規模，咁樣可以增加業績，但呢個5,000萬嘅大劫案可能會令更多消費者望而卻步。

另一方面，據內媒引述中國黃金一位不具名高層指出，呢啲加盟店係違法經營，負責人已經被拘留，而且每星期都有消費者嚟中國黃金諮詢，公司都建立咗對接機制。報道又指，案件已經進入司法程序，中國黃金方面「在積極配合，暫時還沒有進展」。《I》