本港「由亂到治」以嚟，港府不再著重連通歐美，轉而力推中東、東南亞機遇，家族辦公室更係港府工作嘅重中之重。來自阿聯酋杜拜統治家族嘅Ali Rashed Ali Saeed Al Maktoum，月初宣布打算喺香港建立家族辦公室，並擬投資5億美元（約39億港元），獲港府高規格接待。不過，佢昨（27日）晚突然宣布推遲今日開業儀式。《南華早報》報道指，最後關頭決定煞停，原因係王子「有急事」要返國處理。

佢昨日（27號）出席完「裕澤香江」高峰論壇之後，晚上突然稱要推遲家族辦公室嘅開幕典禮，佢嘅辦公室發聲明話「杜拜有緊急事務需要謝赫（Sheikh，具酋長意思嘅尊稱銜）關注」，所以開幕典禮會改期。

聲明續指，佢嘅香港家族辦公室，正式開幕嘅新日期會喺適當嘅時間確定，希望公眾可以理解呢次「不幸嘅延期」。去年，港府訂立咗目標，喺2025年之前吸納200間家族辦公室落戶香港，而家最新消息係進度唔錯，但大多數嚟香港設立家族辦公室嘅人都好低調，冇公開身份同埋投資額，所以佢喺香港嘅投資特別引人注目。

佢年僅28歲，同杜拜統治家族嘅關係曾經引發討論。佢月初曾一度被稱為杜拜酋長嘅「姪子」，不過之後更正為家族成員。最後，阿聯酋領事館喺《南華早報》嘅查詢中證實佢既係杜拜「統治家族成員」，又係「謝赫」，而大多數嘅謝赫都有自己嘅私人辦公室。

佢月初宣佈想喺香港投資5億美元搞家族辦公室，仲指香港係聯繫阿聯酋同大灣區嘅中間地帶，希望探索各種唔同嘅合作夥伴關係，包括地產、旅遊、金融科技同埋人工智能等投資。佢過去一個禮拜喺香港好活躍，周二就同特首李家超見面，又出席咗一個大學嘅活動。昨日，佢就出席咗港府嘅第二屆「裕澤香江」高峰論壇，參加咗「慈善及財富傳承」嘅主題討論環節。

近年嚟，美國同中國嘅關係變差，香港喺金融同科技領域都受到美國制裁。港府跟住北京嘅步伐，開始開拓東南亞同中東嘅市場。去年就公佈咗一個叫做「有關香港發展家族辦公室業務嘅政策宣言」，用各種優惠條件，例如稅務上面嘅好處，吸引海外有錢嘅家族來香港成立家族辦公室。

德勤早前公佈，香港有超過2700間單一家族辦公室，比新加坡喺前年公佈嘅1400間多咗好多。《I》