自從厄瓜多爾暫停中國公民免簽證待遇後，經中美洲「走線」去美國嘅難度大增。唔少中國走線客另闢蹊徑，入境可以免簽嘅波黑、塞爾維亞等巴爾幹半島國家後，再偷渡到歐盟境內。

英國 《衛報》報道，近年愈來愈多中國人冒險穿越巴爾幹半島，計劃偷渡入歐洲聯盟國家，尋找新出路，佢哋將呢條路形容為「奔向自由之路」。

喺波斯尼亞-黑塞哥維那（Bosnia and Herzegovina，簡稱波黑）北部小鎮比哈奇（Bihać），距離歐盟成員國克羅地亞嘅邊境淨係得8公里，呢度成為咗移民偷渡嘅中轉站。

而當地一個破舊嘅水塔更加變咗佢哋嘅臨時棲身地。水塔牆上貼滿咗用多種語言寫嘅傳單，其中竟然有用簡體中文寫住：「如果您想前往歐洲（意大利、德國、法國等）旅行，我們可以幫助您」，仲附上WhatsApp聯絡號碼，隨時接頭。

《衛報》記者親赴波黑，訪問咗一班想偷渡去歐洲嘅中國人。其中一位搏命偷渡嘅中國人張先生。佢今年4月，帶住兩個細路仔，離開咗河北省廊坊市，花費數千英鎊嘅開支，途經四個國家，終於嚟到波黑。期間，佢哋被克羅地亞邊境警察拘留過。而家一家人暫住喺波黑首都薩拉熱窩（Sarajevo）郊區嘅臨時移民接待中心。

張先生表示：「說實話，對我而言，以這種方式進入其他國家並不是很光彩。我們知道有很多國家的人都討厭像我們這樣的人…但如果祖國安全，根本沒人想離開祖國。」佢 話自己嘅兩名子女年僅10歲同7歲，「我無法向他們解釋到底發生了什麼事。我只告訴孩子，我想給他們更好的生活…他們（在中國）根本沒有未來」。

波黑邊境警察提供嘅數據顯示，2022年因為試圖非法跨越波黑邊境被捕嘅有1萬4千多人，其中有兩人係中國人。去到2023年，被捕嘅中國人數目急增至148人，大部分喺試圖偷渡去克羅地亞嘅時候被捉。今年上半年，已有超過70名中國人被拘捕。

根據波黑同克羅地亞之間嘅協議，克羅地亞可以將非法滯留嘅人遣返波黑。2021年有3名中國人被遣返波黑，2023年呢個數字竟然飆升到260人。對於中國人嚟講，波黑係一個吸引嘅中轉站，因為波黑同鄰國塞爾維亞一樣，都畀中國人免簽證。

波黑「外國人事務局」發言人柯瓦塞維奇（Aleksandra Kovačević）表示，愈來愈多中國人違反波黑移民規定。佢話，呢啲中國人同好多土耳其公民一樣，利用合法途徑入境波黑，然後再試圖偷渡去西歐國家。《I》