港府配合國家全面嚴打資金外流，金管局近日向全港註冊銀行發出通函，針對內地投資者喺香港開立同使用「投資帳戶」，推出三項更嚴格額外監管措施。銀行之後唔單止要清理過去一年冇活動、零結餘嘅投資帳戶，仲要一路倒查至2023年1月，揪出用可疑或者偽造文件開立嘅帳戶，並強制關閉。新客戶如果想開投資戶口，亦必須簽署聲明，保證投資資金來源係「中國內地以外嘅合法資金」。

據了解，部分中資銀行已經開始收緊審批，甚至勸退只持內地身份證嘅新開戶申請。今次措施，明顯係為咗堵截非法跨境資金流動、洗黑錢風險，以及一啲懷疑繞過內地資本管制、借香港投資戶口炒港股、買基金嘅資金安排。

據《財聯社》報道，近日市場傳出香港部分銀行開立投資帳戶時，要求客戶簽署額外聲明。金管局其後證實，相關監管通函已經喺2026年5月22日，正式向所有香港註冊銀行發出。今次做法亦同香港證監會步伐一致，目標係全面提升開戶標準，同時防範非法跨境證券活動。

今次金管局針對嘅對象，主要係使用中國居民身份證或者護照嘅「個人內地投資者」。銀行日後喺開設同管理呢類客戶嘅投資帳戶時，必須執行三項額外措施。

第一項措施，係倒查至2023年1月，清退用偽造文件開立嘅帳戶。銀行必須展開專項審查，重點識別自2023年1月起，用可疑或者偽造文件開立嘅投資帳戶。相關文件包括身份證明、其他銀行帳戶證明、住址證明或者其他用作開戶嘅材料。一經查實帳戶係用偽造文件開立，銀行將要暫停該帳戶新交易，並要求客戶喺六個月內完成銷戶。更加嚴厲嘅係，相關客戶日後將被永久禁止喺同一間銀行或者其關聯機構重新開戶。

第二項措施，係全面清理「零結餘」休眠投資帳戶。金管局要求，凡係截至2026年5月22日為止，帳戶冇任何資產結餘，而且過去12個月內冇任何客戶主動交易紀錄嘅投資帳戶，銀行必須喺三個月內完成清查。相關客戶要重新更新KYC資料，即係「認識你的客戶」資料，包括身份、資金來源、投資目的、風險承受能力等。若果客戶無法完成更新，帳戶將會被暫停，並喺六個月內註銷。

換句話講，以前有啲內地客可能先喺香港開定戶口，暫時唔擺錢，等有需要時再用。呢種「備用投資戶口」模式，之後將會大幅收緊。銀行唔會再容許大量零結餘、冇活動、身份資料未更新嘅戶口長期存在。

第三項措施，係新開戶必須簽署「資金來源境外」聲明。日後內地投資者如果想喺香港新開投資帳戶，必須提供書面聲明，確認所有用於投資活動同結算嘅資金，均來自中國內地以外嘅合法來源。同時，相關資金存入同提取，只可以透過客戶本人喺香港持牌銀行開立嘅帳戶進行。

換句話講，唔可以再用第三方帳戶、來歷不明款項、或者無法清楚解釋來源嘅資金出入。如果銀行日後發現資金來源違法，或者懷疑違反內地資本管制安排，就要立即關閉相關帳戶。

呢個其實係今次措施入面最關鍵嘅部分。因為佢直接將問題指向一個核心：內地資金究竟係咪合法出境？如果投資者嘅錢本身係喺內地賺返嚟，但未經合規渠道出境，再透過香港投資戶口買股票、買基金，就可能觸碰監管紅線。同時，今次規定亦只針對個人客戶，公司同機構客戶暫時不受影響。由粵港澳大灣區官方推動嘅「跨境理財通」南向通等合規安排，亦會繼續按現有規則執行，唔受今次額外措施直接影響。

過去香港作為國際金融中心，一直希望吸引內地資金南下，參與港股、基金、債券同財富管理市場；但如今港府事事需要配合國家政策，被逼自行斷絕內地資金呢個「金雞母」。對內地客嚟講，香港投資帳戶嘅低門檻年代，已經正式結束。